Shillong, ïaïong 18: Ka khubor kaba sngewsih ïa ka Meghalaya hadien ba ka la duh noh ïa u wei na ki nongshakri ba ju kyntiew ïa ka kam ïalehkai, bah Dister Marbaniang uba la khlad noh na kane ka sla pyrthei ha ka miet sngi Thohdieng na kadaw jong ka jingjia aksiden ha ka 11 tarik ïaïong bad hadien ba la shah sumar ha NEIGRIHMS.
Ka jingkhlad noh u bah Dister Marbaniang ka long ka jingduhnong kaba khraw ïa ki jingïalehkai kriket bad phutbol ha Meghalaya.
Ha ka jingïalang sngewlem kaba la pynlong mynta ka janmiet ha ka por 4 baje, ba la ïalam khmat da u President, u Bah Banteidor Lyngdoh uba dei ruh u MLA ka Mawkynrew Constiuency, kum shibynta ban pynpaw ka dak ka jingsngewlem ïa ka jingkhlad noh jong u Bah Dister Marbaniang.
Na ka liang ki dkhot ka SSA ki la pynlong ka jingsngap jar kaba 2 minit. ki la pynpaw ruh ia ka jingduh kaba khraw ha ki bynta ki kam ïalehkai ha ka jylla.
Ka jingkhlad noh u Bah Dister shisha kan pynblaw ïa ka sur sawa ha SSA Stadium ym tang kata ïa ka jingnoh synñiang kaba shitrhem jong u ha kaba ïadei bad ki kam ka Shillong Sport Association’, la bynrap Bah Banteidor.
La iathuh ba u Bah Dister u mynsaw jur ha jingjia accident ha ka 11 tarik u Iaiong 2026 bad u khlad noh ha ka 17 tarik ïaiong 2026 kumba 11.30 eiei mynmiet. Na ka liang ka Association hadien ka Condolence meeting, ki lah leit ban sngewlem ïa ka iing ka sem u Bah Dister kaba ha Nongrah.
Ha ka por ba u la khlad noh, u bah Marbaniang u bat kum u President jong ka East Khasi Hills Cricket Association, kaba ju trei ban pyrshang kyntiew ïa ka jingïalehkai kriket ha ki distrik bapher bapher shabar jong ka nongbah Shillong. Dei tang ha ka 04 tarik u ïaïong ba ka EKHCA ka la rakhe ïa ka jingpynkut ïa ka lympung ïalehkai District T20 Championship jong ki shynrang.
U bah Dister Marbaniang u la long ruh kum u Manager na ka bynta ki katto katne ki kynhun ïalehkai jong ka Meghalaya Cricket Association, kynthup haduh ka kyrdan Ranji Trophy.
Nalor kata, u la long u briew uba kongsan ha ka phutbol jong ka thaiñ. U bah Dister Marbaniang ula ïatreilang bad ka Royal Wahingdoh FC ha ka por ba ka dang kiew shaphrang bad ïohrung sha ka I-League ha u snem 2014-15 bad u la ïaineh bad ka ha ki por kiba eh jong ka klob tad haduh ba kan da wanphai sha ka jinglong Wahingdoh SC. Ha kane ka por ba u khlad u la long ruh u Sports Secretary jong ka Shillong Sports Association. Kham bun sien dei ka sur jong u kaba ju ïohsngew haba pynbna ha ka por ba pynlong ïa ki jingïalehkai Shillong Premier League bad kiwei kiwei.
Halor kane ka khubor kaba sngewsih, na ka liang jong ka Shillong Cricket Association, kaba la pynbna paidbah ïa ka jingkhlad noh jong u bah Dister Marbaniang, ka la phah ïa ka khubor sngewlem sha kiba haïing hasem bad ki paralok ba ïajan.
“Da ka jingsngewsih kaba khraw bad ka dohnud kaba khia ngi pyntip sha baroh ki dkhot ïa ka jingkhlad noh jong u bah Dister Marbaniang u President ka East Khasi Hills District Association. Ngi pynpaw ïa ka jingsngewlem sha kiba ha ïing ha sem, ki paralok, bad kiba ieid ba thoiñ jong u ha kane ka por kaba eh. Ai ba ka mynsiem jong u kan shongthait ha ka jingsuk bymjukut,” la ong u President ka SCA bah Peter Mac Kharsawian ha ki rynsan Social Media.
Kumjuh ruh na ka liang u President barim ka MCA bad SCA u Naba Bhattacharjee u la ong, “Nga sngewsih bad sngewkhia jur ïa ka jingkhlad noh jong u Bah Dister Marbaniang. Ngi dang mutdur ba kum u nongïakhun un lah ban lait na ka jingma jong kane ka jingjia aksident.”
“Ngi la ïatrei lang ha Shillong Cricket Association naduh u snem 2006 bad nangta ha Meghalaya Cricket Association tad haduh mynta dangshen. U la long u dkhot uba don shisha ka thong bad uba aiti lut ha kaba kyntiew ïa ka jingïalehkai kriket ha ka jylla jong Ngi. Kum u President nongseng jong ka East Khasi Hills District CA u la don ka bynta kaba kongsan ban rah ïa ka kriket sha ki jaka bapher bapher jong ka District. U la shakri ha ki kyrdan bapher bapher ha ka MCA khamtam kum u Manager na ka bynta ka kynhun ïalehkai Senior.”
Uwei pat u briew uba la ïatreilang bad u bah Dister Marbaniang ha kaba ïadei bad ka jingkyntiew ïa ka kriket naduh tynrai u dei u Secretary barim ka MCA bad SCA-bah Gideon Kharkongor. “Ka long kaba sngewsih shibun ban duh noh ïa u paralok bad uba ïatrei ryngkat ha SCA & MCA. Arphew snem ha kaba pynroi ïa ka kriket ngi la ïaid ryngkat shaduh ki jaka kyndon jong ka jylla. Ka jingïaid lynti kaba khatduh jong u ka dei ka Cricket Mission ha Sohra. U Blei un nang kyrkhu ïa ka longïing jong u,” u la ong.
U General Secretary ka Meghalaya State Olympic Association u bah Finely L Pariat ruh u la pynpaw ka jingsngewlem halor katei ka khubor. “Ka khubor kaba sngewsih ïa ka jingkhlad ba sngewsih jong u paralok jong nga uba nga la ïatreilang ha ka Shillong Sports Association la palat 30 snem. U la long u briew uba trei shitom bha ha kano kano ka kam kaba u la bat. Ai ba ka mynsiem jong u kan shongthait ha ka jingsuk bad to U Blei un don ryngkat bad kiba haïing hasem jong u ha kane ka por kaba sngewsih,” u la ong.
