Shillong, ïaïong 19: Ka Maram FC ka la jop lynter ïa ki jingïalehkai jong ka ha ka lympung 5th Meghalaya State League, da kaba jop da 4-1 kol hadien ba ka la wanphai na ka shi kol pyrshah ïa ka Balmanduri FC ha ka Group G ha Williamnagar ha ka sngi Saitjaiñ.
Ha kawei pat ka jingïalehkai kaba la long ha kajuh ka sngi, ha ka Group F, ka Lawbah SC ka la khur ïa ka jingjop da 3-2 pyrshah ïa ka Umlakro SC ha Mairang.
Ka Maram kaba dei ka klob ïalehkai jong ka Tura District Football Association, ka la jop da 3-2 kol pyrshah ïa ka A’chik SCO Rongjeng ha ka jingïalehkai ba nyngkong bad ha ka sngi Saitjaiñ ka la jop da ka jingkheiñ kaba kham bun kol pyrshah ïa ka Balmanduri, kaba dang ïakhun ïa ka MSL kaba nyngkong jong ka.
Ha ka jingïalehkai ka Balmanduri ka la ïoh ban lamkhmat ha ka minit kaba 40 lyngba u Ganapati Rabha, hynrei ha ka kylla miet ka Maram ka la wanrah ïa ka jingïalehkai kaba kyrpang ban thep saw tylli ki kol ba la wan lyngba u Santosh Teron (51′), Bris Taro (66′) bad u Jakchim K Marak (84′, 88′).
Ka la jan long kumjuh ha Mairang, ha kaba ka Umlakro ka la pynkhihjar nyngkong lyngba u Georgesteven Thangkhiew ha ka minit kaba 21. Pynban tang hapoh ar minit ka Lawbah ka la thep ar tylli ki kol lyngba u Mebadonbor Shangpliang (40’) ban pynïakhaid bad bud sa ka kol jong u Fini Frankly Ramsiej (42’) ban lamkhmat shuwa ban jam sha ka por shongthait.
Ha ka kylla miet, u Georgesteven u la pynkhihjar biang na ka bynta ka Umlakro (61’) hynrei tang hadien 20 minit u Kitborlang Sohtun (81′), rangïalehkai ba mih bujli jong ka Lawbah ha ka kylla miet, u la pynthikna ïa ki lai point da kaba thep ïa ka namtam.
Ka MSL kan wanphai biang ha kane ka sngi Nyngkong da phra tylli ki jingïalehkai, ha kaba baroh kin sdang ha ka por 3 baje nohphai sngi.
