Shillong, ïaiong 19: U Myntri ka tnad Sports & Youth Affairs jong ka sorkar jylla, Bah Wailadmiki Shylla ha ka sngi Saitjaiñ u la aiti ïa ka song kyrshan pisa kaba haduh 3 Klur tyngka sha ka Shillong Lajong FC kum ka jingithuh ïa ka jingtreiborbah jong ka haduh ban da poi sha ka rynsan Indian Football League.
Kane ka song pisa ka dei kaba ka sorkar jylla ka la pynbna ban ai ïa kino kino ki kynhun ïalehkai na ka jylla kiba poi sha ka lympung ïalehkai kiba heh ha ka Ri kum ka Indian Football League lyngba ka CM Football Mission.
“Na ka liang ka sorkar jylla lyngba ka CM Football Mission ngi don ïa ka skim ba kino kino ki klob kiba shim bynta ha ka I-League ka sorkar kan ai 3 klur tyngka. Ka Shillong ka la rung lypa kumta kane ka dei ka khubor ïa kiwei kiwei ki klob ba lada ki rung sha ka I-League kin ïoh ïa ka jingkyrshan pisa kaba 3klur tyngka,” u la ong haba kren hadien ba la dep ban aiti ïa katei ka song pisa.
Ha kajuh ka por u la ai ruh ka jingkitbok ïa ka kynhun ba kan nang lah ban leh bha shuh shuh nangne shakhmat ban rah ïa ka burom jong ka jylla ha ki lympung ïakhun kiba heh ha ka Ri.
Katba na ka liang u President jong ka Meghalaya Football Association (MFA), Bah Hamlet Dohling u la ïathuh ba kane ka jingkyrshan pisa kaba ka sorkar ka ai sha ki klob kiba rung ha ka I-League kan long kum ka jingai mynsiem ïa kiwei pat ki klob nalor ba ka jylla ka la don lypa ïa ki rangïalehkai kiba kynsai suda.
Ïa kane ka jingkyrshan pisa, u Myntri u la ai ha ka sngi ba ka Shillong Lajong FC ka ïakhun pyrshah ïa ka Aizawl FC ha madan JN Stadium Polo. Kane ka kynhun ïalehkai ba kynsai na ka jylla ka la khur ïa ka jingjop kaba don burom da kaba ïoh ban pynliem haduh 6-1 kol ïa ka Aizawl ha kane ka janmiet.
