Nongstoiñ, Ïaiong 19: Kum shi bynta ban pynïaid shakhmat ïa ka jingrakhe dap 50 snem lane Golden Jubilee, ka Nongpyndeng Sport Social & Cultural Club (NSS&CC), ka la pynlong ïa ka lympung ïalehkai Futsal ha ki kyrdan bapher bapher, kiba kynthup ïa ka Under-10, Under-14, Open Category bad Veteran bad kumjuh ruh ka lympung Futsal na ka bynta ki kynthei. Ïa katei ka lympung la pynlong ha Sankine Futsal Ground, Nondein¨.
Ki don baroh haduh 33 tylli ki team kiba la ïashim bynta ha katei ka lympung. Kine ki kynthup 16 team ha ka Open Category bad Veteran, 8 team ki kynthei, 5 team ki khynnah shynrang ba hapoh 14 snem, bad 4 team ki khynnah shynrang kiba hapoh 10 snem.
Ïa ka lympung jong ka Open Category jong ki kynthei bad shynrang la wan ban plie pyrda da u Commandant ka 4th MLP Battalion Sohpïan, u Bah VDS Rymbai kum u kongsan, u Rev.T.T Diengdoh kum u symbud kongsan, ha ryngkat ka jingïadonlang ki nongïalam jong ka Club ba kynthup ïa u Dr. L.L Mawsor Secretary, u Convener ka Golden Jubilee Futsal Tournament Bah Rockfellar Dkhar, u Bah Yoophi Symblai trai ka Sankine Futsal, ki Rangbah Dong na 9 tylli ki Dong jong ka shnong, ki nongïalehkai, ki khun samla bad kiwei pat.
Ha katei ka sngi, la kham pynphuh pynphieng shuh shuh ïa ka jingïalang da ki jingshad bad jingrwai ba la pyni da ki khynnah samla napoh shnong.
Haba ai jingkren ha katei ka sngi, u Bah VDS Rymbai u la ong ba u sngew kmen ban ïohi ba ka Club ka don ïa ka jingthmu ban kyntiew ïa ki samla lyngba ki kam ïalehkai sport.
U la kdew ba ka sport ka kyntiew ïa ka disiplin, ka ïarap ban lait na ki jingmlien ba sniew bad ka pynkhlaiñ ïa ka met ka phad bad wanrah ruh ïa ka jingïatylli. U la pynpaw ruh ïa ka jingkyrmen ba kane ka lympung kan wanrah jingmyntoi ïa ka shnong ka thaw bad kan ïarap ïa ki samla ban nang kiew shaphrang ha ka jingim jong ki.
