Pynhap pyrda ïa ka Annual School Sports Meet 2026 bad plie thymmai ïa ka Arts Stream ha MAHSS Rangmaw
Rangmaw, Ïaïong 19: Ka Modern Academy Higher Secondary School, Rangmaw (MAHSSR) ka la ïoh ban pynhap pyrda noh ïa ka Annual School Sports Meet 2026 hapdeng ka jingiphuh iphieng bad ka jingkmen jong ki khynnah skul ryngkat ki nonghikai bad ki paidbah shnong.
Ha kajuh ka sngi, la ïoh ruh ban plie paidbah ïa ka Arts Stream na ka bynta ki khynnah skul, kaba la wan ban pynjanai shuh shuh ïa ki lad pule nalor ka Science Stream kaba la don lypa ha kane ka skul. Kane ka jingïoh plie ïa ka Arts Stream ka long shisha kum ka jingkyrkhu kaba khraw ïa ki khynnah skul jong ka shnong Rangmaw bad ki shnong ba marjan, namar kan plie lad thymmai ïa ki ban jied ïa ki bynta pule kiba ki sngewtynnad bad kiba ai jingmyntoi ha ka lawei.
Haba kren ha ka jingïalang, u bah Renikton Lyngdoh Tongkhar, MLA ka Mawkyrwat Constituency u la ai ka jingïaroh na ka bynta ki khynnah kiba la lah ban pyni ïa ka jinglah jong ki ha ka ban ïashimbynta ha ki jingïakop bapher bapher la ka long ha ki jingïamareh, ki jingrwai, jingshad bad kiwei de ki jait program ba la pynlong ha kane ka Annual School Sports Meet.
Ha ka juh ka por u la ai ruh ka jingïaroh ïa ka jinglah jong ki khynnah skul ha ka ban pynleit jingmut ha ki jingpule khamtam eh lyngba ka jingpyntbit jong ki ha ka ban ïa kren da ka ktien phareng bad kren ruh da ka ktien hindi. Haba kren ha kaba ïa dei bad ka jinglah jong kane ka skul ba nalor ka Science Stream mynta pat ka la lah ban plie paidbah sa ïa ka Art Stream ha kaba kane kan sa long sa uwei pat u maw jam ban pynjan bad pynjanai ha ka liang ka pule puthi jong ki khynnah pule kiba kwah bteng ïa ka jingpule ha la ka jong ka shnong.
Ha ka bynta jingïalehkai, kine ki long ki nongjop kiba la wan shakhmat kata Best Participant dei u Wallambiang Jyrwa, Best March Past dei ka Green House bad Best House dei ka Blue House.
Ha kane ka sngi kyrpang la wan ban sakhie lang da ka kong R. Sohklet, DSEO, South West Khasi Hills District, u bah Drus Lyngdoh, u bah Jeslanroy Nongsiej, ryngkat ki nonghikai, ki khynnah skul bad kiwei de ki riew rangbah kiba la shah khot sngewbha.