Nongpoh, Ïaiong 13: Hadien ka jingïakhih bad ka jingïa umsnam kaba jur ha Ri Lum Garo dang ha kine ki khyndiat bnai bala dep, kaba la ktah ruh ïaka shongsuk shongsaiñ ki paidbah, u Esmatur Mominin MLA barim ka Phulbari Constituency u ba la phet rieh ïalade na katei ka jingjia, mynta ka sngi u la wan ban pyndem noh haki pulit ka Ri-Bhoi ha Nongpoh Police Station.
U Mominin u la phet rieh ïa lade hadien ba la mih ki jingia um snam ha shwa ka elekshon sha Garo Hills Autonomous District Council (GHADC) ha u bnai ba la dep.
Katkum ka jingiathuh jong ki heh sorkar, katei ka jingiaklumar ka la sdang naduh ka 9 tarik u Lber, ha kaba u Mominin u la poi ha ophis jong u Deputy Commissioner ha Tura ban thep kyrteng na ka bynta ka elekshon ha GHADC. Ka jingwan jong u ka la pynmih ïa ka jingklumar ha ophis jong u DC, kaba la lam pat sha ka jinglong jingman kaba la ktah ïa ka shongsuk shong sain.
Hadien ha kajuh ka sngi, la kynnoh ba u la ai jingkren ba pynkhih win ne pynshit ha Chibinang, kaba la pynlong ban mih ka jingklumar ba jur kaba la saphriang ha ki bynta jong ka Garo Hills.
Hadien kine ki jingjia, ka jinglong jingman ka la nang sniew bha, kaba la pynlong ïa ki bor synshar ban pynsangeh noh ïa ka elekshon GHADC hapdeng ka jingeh ha ka liang ka jingshngain.
Ki tyllong khubor na ki pulit ki la pynthikna ba u Mominin u la phet rieh ban lait na ka jingshah kem naduh katei ka por.
Haba pyrshang ban wad jingtip naki Pulit Ri Bhoi kim pat lah ban kren ei ei halor kane ka jingwan pyndem utei u MLA barim namar ka jingtohkit ka dang ïaid shakhmat.
