Shillong, Iaïong 13: Katto katne ngut ki nongshong shong shnong ka Dymmiew Mawprem, kiba la kem pang ki la kynnoh ba kane ka la jia hadien ba ki la dih bad pyndonkam ïa ka um ka tnad Public Health Engineering (PHE), kaba ki la tan lyngba kawei ka top-um ha ka shnong.
La kynnoh ba kane ka jingkem pang ka dei namar ka jingjaboh jong ka Um ïa kaba la pynthikna da ka State Food Testing Laboratory ha ka kaiphod leh test ba 2 tarik Lber 2026, kaba la pyntip ba ka um kam long kaba shngaiñ ban dih bad ka don jingma ïa ka koit ka khiah lada dih ïa ka.
ïa kane la pyntip da u Rangbah Shnong ka Mawpren Dymmiew Bah Manphyrnai Marbaniang ha ka 11 tarik Iaiong 2026 hadien ba la wan jurip ïa ka top um bad ïa ki pipe ba ïaid na ki nala harud surok.
Ha ka jingleit jurip la ïohi ruh ba ki pipe um ki ïaid lyngba ka nala kaba jaboh bad i saitmet ban peit bad ka jingbym wan khmih na ka liang ka tnat PHE, ki longïing jong ka shnong ki la hap ban pyndonkam da ka umbam umdih kaba jaboh.
Haba kren sha ki lad pathai khubor u Bah Manphyrnai u la ïathuh ba ki don kumba 11 tylli ki longïing kiba la tan um na ka tei ka top ba pynpoi um ka PHE.
Ula ïathuh ba kine ki longïing ki la pyndonkam ïa ka um bam na katei ka top naduh u bnai Kyllalyngkot 2026, bad haduh mynta ka tnat PHE kam shym la shim khia ban peit ne pynïoh ïa ka umbam umdih kaba khuid ba suba.
“Nga la thoh da ka shithi sha ka tnad PHE, ba kan peit lem halor kane ka jingïoh um ba jakhlia jong ki longïing ha Mawprem Dymmiew, hynrei haduh mynta kim shym la wan peit ne khmih ïa ka um,” u la ong.
U Bah Manphyrnai Marbaniang u la kyrpad biang ïa ka tnad PHE ba kan shimkhia mardor ban wan peit bad jngoh ïa kane ka um, khnang ba ki longïing hapoh ka shnong kin ïoh ïa ka umbam umdih kaba khuid ba suba.
“Ngim tip ba kaei ka daw ba ki ophisar ka tnad PHE kim shym la wan jngoh ïa kane ka um ban pynthikna ba ki nongshong shnong kin ïoh ka umbam umdih kaba khuid. Nyngkong ngi dang mut ba ka um kam lei lei hynrei hadien ba la dep phah peit bniah la lap ba ka um ka long kaba jaboh” ula ong.
