Nongstoiñ, Ïaiong 13: “Lada ka sorkar bad ki bor pynïaid District jong ka West Khasi Hills kiba dei peit ïa ka election, kim lah ban leh ei ei ïa ki nongshong shnong ha khappud kiba ju leit thep vote ha Assam bad Meghalaya, ka jingïakren pynbeit pud kan ym poi shano shano ruh”, ong u bah P.Nongshlong uwei na ki riew rangbah bad nongïalam ka shnong Mawïamsyiem, ka shnong kaba doh shaphang shatei na Langpih ha syndah bad ka jylla Assam.
Utei u rangbah u la ong ruh ba naduh ba u dang sdang ban leit shong shnong ha katei ka jaka, um shym pat la lah ban pynthikna ba ki don shibun ki nongshong shnong ha katei ka thaiñ kiba thep vote ha Assam bad ha Meghalaya. Hynrei hadien katto katne u la sdang ban lap lyngba kawei ka Election Photo Identity Card kaba la shu Xerox bad katei ka EPIC, ka dei kaba don ha Assam bad ha Meghalaya.
U la ïathuh ba u la lum ïa baroh ki paidbah nongshong shnong ban tohkit, hynrei ha kaba nyngkong kim shym la ïathuh satia hynrei ki len bad ki ong ruh ba kim kwah ban leit bad ka Assam. U la ong ruh ba kum u nongsynshar shnong u la ther da kaba tyngeh bad u la maham ruh ïa ki, da kaba ong ba lada kim ïathuh ïa ka jingshisha un khot da ki briew ka aiñ na Meghalaya bad na Assam ba kin tohkit kham bha shuh shuh.
U la ong ruh ba hadien ba u la ther da kaba tyngeh baroh kiba don EPIC ha baroh ar liang ki la phla lut bad lada kheiñ ka jingdon jong ki baroh ka la palat ïa ka shispah ngut tang ha katei ka thaiñ jong u.
Ym tang katta hynrei kiwei kiwei ki shnong ruh ki la sdang ban pynpaw halor kane ka jingleh ar maloi, kat haduh ba ki bor nongsynshar shnong Langpih area, da kawei ka sur ki la lum jingïalang bad rai ba baroh kito kiba ioh jingmyntoi na ka Assam kum ki ration card, ki EPIC bad kiwei ki dei ban sangeh noh.
La ong ba hadien kane ka rai, kiba bun bah ki paidbah nongshong shnong kiba dei ki Garo bad Khasi ki la mynjur bad bun ruh kiba la weng noh ïa ki card ration bad leit aiti noh ïa ki EPIC. Hynrei, ki khubor ki ong ba haduh kine ki sngi ki dang don kiba dang leit buit tuh bad dang kmen ïa ka jingïoh jingmyntoi na ka Assam.
Na ka liang u bah Nongshlong u la ong ruh ba ha kaba ïadei bad ka jingdon ar tylli ki EPIC bad ka jingthep vote ar jaka jong kitei ki nongshong shnong, um shym la pynbor ïa ki ba kin wan noh sha Meghalaya ne ba kin leit sha Assam.
Hynrei u la ong ïa ki ba lada ki kwah ban leit shano shano ruh ka shong ha ka mon jong ki, tangba u la maham pat ba kim dei ban buh ar tylli ki EPIC ne ban leit thep vote ha baroh ar liang, hynrei ki dei ban rai ba kin don beit tang ha kawei ka jylla la ka dei ha Meghalaya ne bad ka Assam.
U la ong ruh ba baroh shikatta phew snem, ka Assam ka kynnoh ba ka Meghalaya ka kyntur pud bad ka Meghalaya ka kynnoh ba ka Assam ka kyntur pud.Kitei ki jingeh baroh kiba mih ha khappud ka dei kaba ki paidbah shnong ki thaw hi hynrei lada dei ba ki paidbah kim thaw hi, kan ym don satia ka jingklumar namar lada ki paidbah kim pdiang satia ïa ki jingmyntoi ba ka sorkar Assam ka wan tyrwa, kan ym nud ban kam ba katei ka thaiñ ka dei jong ka Assam.
Kumta halor katei ka mat u bah Nongshlong u la kyntu ïa u District Election Officer jong ka West Khasi Hills, ba u dei ban leh ei ei ïa kitei ki ar maloi. Nalor kata ka sorkar ka la dei ban pynkloi katba lah ban khot ïa kitei ki briew ba kin wan ai ka jubab kaba shai lada ki kwah ban sah ha West Khasi Hills, ki dei ban phah weng noh ïa ki kyrteng kiba la pynrung ha ka Assam. Lada ki kwah ban sah ha Meghalaya bad lada ki kwah ban leit sha Assam ruh kin jubab da kaba shai, khnang ba kin weng noh ïa ki kyrteng jong ki na ka thup jong ka Electoral roll jong ka West Khasi Hills.
