Dawa ka FKJGP ïa ka MeECL ban pynbiang ïa ka bording ha ki katto katne ki shnong hapoh u Naitung, 2022

Mawkyrwat, Naitung, 14: Ka long kaei kaei ka jing duhnong kaba khraw na ka bynta ki katto katne tylli ki shnong kiba hapoh ka South West Khasi Hills District ha kaba mynta la kumba katto katne bnai ei ei kim shym la ïoh ïa ka bording naduh ba la thut u transformer bad kane ka jingduh ka la buh jingeh shikatdei na ka bynta ki longïing khamtam eh ki khynnah skul bad ki samla pule kiba don ha ki egsam.
Halor kane ka mar, haba kren ha ki lad pathai khubor na ka liang u Working President ka FKJGP South West Khasi Hills District, bah Kenes L. Nonglait u la pynpaw ka jingsngewdiaw ba hadien ka jingïoh jingujor na ki paidbah nongshong shnong ha kaba ïa dei bad ka jingbymbiang ne jingduh jong ka bording ha ki katto katne ki shnong mar mar ki la leit ïa kynduh ïa u Sub Division Officer (SDO) jong ka Meghalaya Power Distribution Corporation Limited (MePDCL) Mawkyrwat Division ban pynsngew bad dawa ba dei ban pynbiang noh khnang ba kan nym long ka jingduhnong ïa ki paidbah nongshong shnong.
Kum ka seng ha kawei pat ka liang ka pynpaw ka jingsngewthamula ba hadien ka jingleit ban ïa kynduh ïa u SDO jong ka tnad bording ha Mawkyrwat ma u pat u la phah kylla ba kin leit ïa kynduh ïa u MLA jong ka Mawkyrwat Constituency, bah Renikton Lyngdoh Tongkhar. Hato kan don ka jingïadei aïu, na ka liang u MLA bad kata ka ophis halor ka kam bording?? buh jingkylli ka seng. Namarkata, ka seng ka kyrpad ba halor kane ka bynta na ka liang ka ophis kam dei ban shimsting hynrei ka dei ban pyrkhat lem na ka bynta ki jingdonkam bording jong u paidbah ba bun balang.
“Ki shnong kiba la duh ïa u transformer ki long ka shnong Jakrem, ka Jashiar, ka Laitnong bad ka shnong Shngimawleiñ”, ïathuh u bah Nonglait, kumta ki la buh ka jingkyrpad ïa ka ophis jong u SDO ka MePDCL Mawkyrwat Division bad kumjuh ruh na ka head office ba ka dei ban pynbiang noh mardor khnang ba ki paidbah nongshong shnong kin nym ïa kynduh jingeh namar tang ka daw jong ka jingbym don jong ka bording khamtam lei lei ha kine ki por ba ki khynnah skul ki dang don hapdeng jong ka jingïaleh egsam.
“Kaba kham ma lei lei lada ym don ka bording ne duh lait ki kam sniew kin ïai jia kum ha ka tuh ka thim bad kiwei de ki kam”, u la ong. Namarkata, ka seng ka kyrpad ïa ka ophis ba ka dei ban leh kham kloi ïa kane ka kam bad ka dei ban pynbiang mardor hapoh jong une u bnai, lym kumta ka seng kan sa shim da kiwei pat ki synjam.
Ha kaba ïadei bad ki jaka buh ïa ki transformer, na ka liang ka seng ka buh ka jingdawa na ka ophis ba dei peit ïa ka kam bording ba ka dei ban pynbiang noh mardor ïa ki jingker kiba biang khnang ba kan nym jia shuh kano kano ka jingmynsaw ne jingduh jong ki mynsiem briew kumba jia ha kine ki sngi ba ladep.