Jowai, Rymphang 04: Ka jingïalehkai phutbol jong ki khynnah ba hapoh 13 snem ka rta ba la tip kum ka 1st Chilliangraij Under 13 Football League la sdang ïaka ha kane ka 2 tarik u Rymphang hapdeng ka jingwan sakhilang u Samehi Laloo, President NPYF, Jowai Block kum u kongsan ryngkat ka jingïadonlang u Waheh Shnong ka Chilliangraij ma D.H. Pde, u General Secretary ma Oriland Shylla, nalor kiwei ki riew rangbah.
Ïa kane ka lympung la peit bad pynïaid da ka Chilliangraij Sports & Youth Affairs Committee ha kaba la don haduh 24 tylli ki team ba la wan ban ïashim bynta bad ka song pisa ba la mang na ka bynta ka lahduh jong kane ka ïakop ka long 10 hajar tyngka bad 5 hajar tyngka ïa kaba sharem.
U Samehi Laloo, President NPYF, Jowai Block haba kren kum u kongsan ula ïaroh ïa ka Chilliangraij Sports & Youth Affairs Committee kaba la shimkhia ban pynlong ïa ki Tournament bapher bapher na ki por sha ki por ha ka thong ban kyntiew ïa ka jingïalehkai Football hapoh ka dong ka thaiñ.
Ki ar tylli ki team kiba lamih madan ban ïatynjuh bor ha kane ka sngi ki long ka Dream Chaser pyrshah ïa ka Salaroh bad ïa ka nam jop ha kane ka sngi la rah da ka Dream Chaser da kaba pynrem ïa ka Salaroh da 6-0 kol.
Ha ka kylla step jong ka jingïalehkai ka Dream Chaser ka la ïoh ban thep lai kol lyngba ka bol ba la kynjat da u Jewell Lyngdoh, u Wamon Phawa bad u Replace Rymbai, katba haka kyllamiet pat ka Dream Chaser ka la ïoh biang sa 3 kol lyngba ka bol ba la kynjat da u Perfect Lyngdoh, u Wamon Phawa bad u Kune Lyngdoh.
