80% dei ban ioh jingmyntoi ki trai district haka thungkam thungjam

Ka jingwanrah ïaka district ha kano kano ka thaiñ hapoh ka jylla, ka jingthmu hi ka long ban wanrah ïaka roi ka par ha baroh ki liang. Ban pynjan sha ki paidbah nongshong shnong ka District bad ka sorkar, ban kyntiew ïaka bha ka miat bad ka jingmyntoi jong ki paidbah haka district, kata naduh ka ioh ka kot, ka rep ka riang ka riti ka dustur, ka rukom im tynrai, ka kamai kajih, ka khaïi pateng, ka pule ka puthi, bad ka iohkam iohjam ïaki samla hapoh ka district.
Haba wan kino kino ki kam pynroi ne ki project, ki skhim sorkar hapoh ka district, ki trai shnong ka district ki dei ban ioh jingmyntoi, ki dei ban ioh bynta ban pyntrei kum ki kontraktor, ki supplier bad kumjuh haka iohkam iohjam ki samla haki shlem ia jinghikai bad ki ophis treikam bapher bapher jong ka sorkar ba don hapoh ka district, ki trai shnong ka district ki dei ban ioh jingmyntoi kham bun la ka dei ka East Khasi Hills, ha Jaintia Hills, ha West Khasi Hills ne Ri-Bhoi bad kumjuh kiwei kiwei ki district haka jylla.
80% dei ban ioh jingmyntoi ki trai district hak thungkam thungjam haki kam sorkar ba lait kiba dei hapoh ka District level bad kiba ïaid lyngba ki District Selection committee, ka Departmental selection Committee bad kiwei kiwei ki Committee ba katba dang don ki trai district dei ban ailad shuwa ïaki lada kila biang ka klas ka kyrdan kumba kwah da ka sorkar, ym ban shu wan tuklar bad shim kabu da kiba nabar ka district.