8 tylli ki mat halor ka jingpynkylla ïa ka Reservation Policy aiti ka UDP sha ka Chairperson

Shillong, Naitung 14: Ka United Democratic Party (UDP) mynta ka sngi Thohdieng, ka la aiti ïa ki jingai jingmut ba phra tylli ki mat sha ka Chairperson ka Committee ki seng sain pyrthei Kong Ampareen Lyngdoh, kiba ïadei bad ka jingshong bishar thymmai ïa ka State Reesrvation Policy ka Jylla.
Haba kren sha ki lad pathai khubor u general secretary ka UDP u bah Jemino Mawthoh ula ong ba ha ka jingïalang bad ka myntri ka tnat Law, na ka liang ka UDP ka la ai ki jingai jingmut kiba bha tam bad kiba lah ban pdiang da baroh ki jaidbynriew kiba don ha Meghalaya.
U bah Jemino ula ïathuh ba naka liang ka UDP kala shong jingïalang haduh 14 sien ha ka jingdon lang ki stad aiñ bad ki stad haka pule puthi ban ïakren kumno ban phah ïa ki jingai jingmut sha ka sorkar kiba biang tam ïa baroh ki jaidbynriew hapoh ka jylla.
Haba kylli kiei kita ki jingai jingmut, naka liang u bah Jemino ula ong “Haka jingïalang ka Myntri ka tnat Law ka la pynpaw sha ngi ba kam pat long ban pyntip paidbah, kiei kita ki 8 tylli ki jingai jingmut ba ka UDP ka la aiti sha ka Chairperson namar ïa kine ki jingai jingmut yn hap ban phah rah sha ka Expert Committee”.
U bah Jemino ula ong ba watla kam pat long ban pynpaw paidbah ïa ki jingai jingmut hynrei na ka liang ka UDP ka la dep ban bishar bniah bha ïa baroh 8 tylli ki mat bad ka Party ka sngew ba kine ki jingai jingmut kim long pyrshah ïa kano kano ka jaidbynriew kiba don hapoh Meghalaya.
“Ngi la ïa im lang bad ki jaidbynriew Garo mynta la palat 51 snem bad nga ngeit ba ngi don ka jingïasngewthuh jingmut hapdeng baroh ar jaidbynriew ban wanrah ka jingkylla hapoh ka Reservation Policy kaba lah ban pdiang da da baroh ki jaidbynriew kiba don ha Meghalaya” ula ong.