Thaw ka sorkar ïa ka State Education Commission ban ai buit ïa ka tnad pule

Shillong, Naitung 14 : U Myntri ka tnad pule puthi ka jylla u Rakkam A Sangma mynta ka sngi Thohdieng u la pynbna ba la thaw ïa ka State Education Commission (SEC) kaba kynthup ïa ki saw ngut ki dkhot hapoh ka jingïalam U Prof Sherwin May Sungoh uba dei u Head of Education Department ka NEHU kum u Chairperson. U Prof David Reid Syiemlieh IFS ba la shongthait bad ruh u Chairman ba mynshwa ka UPSC bad u Executive Chairman ba mynshwa ka MBOSE u Tony TC Marak kum ki nongaibuit. U Secretary ka tnad pule puthi ka jylla u Ambrose Ch Marak kum u Member Secretary.
Nalor kine ka SEC ka la jied bad pynrung dkhot ruh sa 12 ngut kiwei pat ban ïarap ïa ki kam ka Commission, ïathuh u Sangma ha ki lad pathai khubor hadien ba la dep shong jingïalang ban kyrtiang dien bad bishar bniah halor kane ka Commission.
U Rakkam u la ïathuh ka por treikam jongka SEC kan long arsnem naduh ka sngi ba pynmih ïa ka jingpynbna. Halor ki mat treikam u Myntri u la ïathuh “ Ka Commission kan ai buit bad ai jingmut ïa ka sorkar jylla khamtam ïa ka tnad pule puthi halor ki kam ba ïadei bad ki skul bad college, kumno ban siew ïa ka tulop sha ki nonghikai, ban pynbha ïa ki skul ki college bad ban peit ruh ba ki tnad pule dangle jongka sorkar ki dei ban treikam hok khlem kano kano ka jingpynwit ne pynthut”.
“ Nalor kata kan ai jingmut bad ai buit ïa ka sorkar halor ki rukom treikam bapher bapher kumno ban pynïaid shakhmat ïa ka polisi treikam ban wanrah ki jingpynkylla ha ki skul bad ki kyrdan ba kham shalor kat kum ki jingkdew lynti ka National Education Policy (NEP) 2020” ong u Rakkam. Shuh shuh ka Commission kan ai jingmut bad pyni ruh ïa ki kam ban wanrah ki jingkylla ban kyntiew ïa ka pule puthi ha ki skul bad college bad Higher and Technical Education.
Kumjuh ruh ka Commission kan peit bad bishar bniah ruh ïa issue kiba ktah ïa ka pule puthi ha ka jylla bad nangta kan phai ruh sha ki rukom pynïaid bad treikam jong kito ki skul bad college ba ïarap da ka sorkar.Kumno ki School Managing Committee ki pynïaid ïa ki skul bad hadien kane kan ai jingmut ïa ki rukom ai grant ne jingïarap ïa kine ki skul bad college.
Kan dei ruh ka kamram jongka Commission ban peit ïa ka jingdon jong ki skul namar ki don ki jaka bym don skul, ki don ki jaka ba bun eh ki skul, ki don kiba duna ki khynnah skul, ki don pat kiba bun ki khynnah skul hynrei ki nonghikai ki duna, nangta ki nonghikai ban hikai ïa ki ktien tynrai lajong bad kumta ter ter.
Lyngba kane ka Commission kan bishar bniah ruh ïa kiba bun ki jingeh bad jingkynrum kynram kiba don ha ka tnad pule puthi bad kan ai jingmut kiei ki jingdonkam ban warnah ki jingpynkylla la ka long ha ka rukom treikam ne ka polisi treikam jongka tnad ruh. Kan pynkhreh ruh ïa ka polisi ba thymmai ka ban ïa ryngkat kyrdan bad ka NEP 2020 bad ai jingmut ruh kiei ki subjek ba thymmai ba dei ban pyndonkam ha ki skul bad ki college, ki skul kin plie naduh katno haduh katno, katno kin ïoh shuti bad kiei ki prokram baroh shisnem ruh.
Ki khatar ngut ki dkhot ba pynrung ha ka SEC ki long Dr CAR Diengdoh, retd CDC, NEHU, Dr Vanessa Kharmawphlang, principal jong ka CTE (PGT) Shillong, Dr Nikme Salse Ch Momin, Prof NEHU Tura Campus, P Ryngksai, retd additional Director of School Education & Literacy, Dr Charles Rueben Lyngdoh, associate professor, Synod College, Sanggra A Sangma, associate professor, department of History, Donbosco College, Tura, Rahul Chatterjee, assistant lecturer (physics), Jail Road Boy’s Higher Secondary School, Shillong, Brother Solomon T Morris, Principal, St Edmunds School, Catholic Christian Brother Institution, Shillong, Richard Uriah, Principal North Liberty Hr Sec, School, Jowai, FC Shullai, retd Primary School Teacher, Polo Hills, Shillong, Aaron Warjri, Principal Shillong Public School, Shillong bad Dr (Fr)Phillip Abraham SJ, Principal Loyola College & Loyola Hr Sec School, East Garo Hills