Shillong, Naitung, 14: Ka Balang Catholic ha Meghalaya ka la pyrshah bad pynpaw ïa ka jingbym sngew ïahap halor ka jingtyrwa ban pyntreikam ïa ka Uniform Civil Code (UCC) ha ka ri India.
Ha ka shithi ba la phah sha ka Law Commission of India, New Delhi ha ka sngi Balang, la soi da u Arcbishop ka Jylla Niam Bah Shillong u Most. Rev. Victor Lyngdoh, u Auxiliary Bishop ka Jylla Niam Tura u Most Rev. Jose Chirackal, u Bishop ka Jylla Niam Nongstoiñ u Most Rev. Wilbert Marweiñ bad u Bishop Elect ka Jylla Niam Jowai, u Most Rev Ferdinand Dkhar.
“Ngi sngewnguh shikatdei ei ïa U Blei ba ngi long ki nongshong shnong jong ka ri India. Ngi long kiba donbok ban don ïa ka riti Synshar jong ka ri India kaba ïada ïa baroh ki nongshong shnong ha ka ri. Ngi don ha ka ri kaba burom ïa ka jingïatylli wat hapdeng ka jingïapher bad ngeit ruh ba ka India ka dei ka ri kaba burom ïa ki jait Niam. Ka dei ka ri kaba shah ban don la ki jong ki aiñ halor ka shongkha shongman, ka jingpyllait san shyieng, ka jingïoh pateng, ka spah ka phew bad kiwei kiwei. Hynrei ka jingpynbna paidbah ba la pynmih ha ka 14 tarik, Jylliew, 2023 da ka Law Commission of India ha kaba ïadei bad ka jingpyntreikam ïa ka UCC ka dei kaba pynsngewkhia bha ïa ngi,” la pynpaw ka Balang ha ka dorkhas ba la phah sha ka Law Commission.
Ka Balang Catholic ka la kdew ruh lai tylli ki mat ban pyrshah haba pyntreikam ïa ka UCC ha ka ri.
“Ki aiñ kiba mih na ka jingdon jong ki riti ki dustur, ki jingngeit bad ki jingleh jingkam kiba ïadei bad ka jingngeit niam yn ym lah satia ban leh shiliang lane ban pyndam noh da kaba wanrah ïa ka UCC. Ngi pynpaw ka jingpyrshah kaba jur ba ki jingngeit, ki riti ki dustur bad ka tynrai jong ‘kawei ka niam’ yn pynjari ha kiwei pat ki jingngeit lyngba ka UCC. Ka Article 25 ïa ki kynhun niam ka hok ban pynïaid la ki jong ki kam,” ong ka dorkhas.
“Hapoh ka riti Synshar jong ka ri India (Article 341, 342 bad ka Sixth Schedule) la shna ïa ki kyndon ba kyrpang ban pynkupbor ïa ki jaidbynriew riewlum. Ka jingpynrung ïa ka UCC kan pynjot syndon ïa ki hok kyrpang bad ïa ki jingmyntoi ba la ai sha ki jaidbynriew riewlum,” la bynrap ka dorkhas.
“Haba ka 21st Law Commission ha u snem 2018 ka la pynpaw ïa ka jingsngew ba ka jingpyntreikam ïa ka Uniform Civil Code kam da dei eh kaba donkam haduh katta katta lane kaba da kwah da baroh ha kum kane ka por, namarkata, kaei ka jingkyrkieh jong ka Sorkar pdeng ba ka kwah ban pyntreikam noh ïa ka UCC,” ong shuh shuh ka dorkhas.
