SHILLONG, Nailar 04: Ka Meghalaya Boxing Association [MBA] ha ka jingïatreilang bad ka tnat Sports jong ka Sorkar Jylla (Directorate of Sports & Youth Affairs) kan sa pynlong ïa ka rynsan ïakura na bynta ki kynthei bad shynrang kaba la tip da ka ‘State Sub-Junior & Junior Boys & Girls Boxing Championships’ hapoh Indoor Sports Hall, Mawlai Mawroh, Shillong naduh ka 7 tarik haduh 9 tarik u Nailar, 2024.
Kumba100 ngut ki nongïakura na ki 8 tylli ki District, ba kynthup lai tylli na Garo bad san tylli ki District na Khasi, Jaintia bad Bhoi kin sa ïashimbynta ha kane ka rynsan ïakura State Boxing Championships.
Ka jingthmu jong kane ka lympung ka long ban plielad plie lynti ïa ki nongïakura na kylleng ka Jylla ban pynpaw pyrthei ïa ka sap bad ka jingtbit kaba ki don. Lyngba kane ka lympung ka MBA ka la rai ruh ban jied ïa ki lahduh (ha baroh Kynthei bad Shynrang) ban mihkhmat ïa ka kynhun ïakura ka Jylla sha ki lympung ban sa wan, la kadei ha ka Regional bad ruh National Boxing Championships.
Ka karta ba la buh na bynta ka Sub-Junior Division ka dei hapdeng kiba dang 13 haduh 14 snem, bad ka kyrdan Junior Division ka dei hapdeng 15 haduh 16 snem.
Ha kane ka lympung la phiah ha ki kyrdan bapher bapher katkum ka jingkhia kilo na bynta baroh Shynrang bad Kynthei, ha ka Sub Junior kin don haduh 14 tylli ki kyrdan jingkhia (weight category) ba kynthup 31-33 kg , 33-35 kg, 35-37 kg, 37-40 kg, 40-43 kg, 43-46 kg, 46-49 kg, 49-52 kg, 52-55 kg, 55-58 kg, 58-61kg, 61-64 kg, 64-67 kg bad kaba 67-70 kg. Ha ka Junior kin don 12 tylli ki kyrdan jingkhia, kine ki long: 44-46 kg, 46-48 kg, 48-50 kg, 50-52 kg, 52-54 kg, 54-57 kg, 57-60 kg, 60-63 kg, 63-66 kg, 66-70 kg, 70-75 kg bad 75-80 kg.
Ka rukom pynïaid ïa ka jingïakura ka long 3 wat (round) kaba long 2 minit kawei kawei, bad kin la aipor ban shongthait 1 minit ha man kaba kut ka wat. Ka rukom bynta 10 point jong ka IBA bad ïa kane ka Championship yn pynlong katkum ki kyndon pynïaid jong ka IBA (Technical & Competition Rule). Ka jingïakhun kan sdang naduh ka por 10 baje mynstep ( naduh 7 haduh 9 tarik Nailar,2024).
