7 ki takma ksiar, 3 rupa, 3 rnong khur ki samla ïalehkai kick boxing ka jylla na ka 2nd International Kick Boxing Woko Tournament Championship

Nongpoh, Naiwieng 09 : Ki khun Samla jong ka jylla katba nangmih ki sngi ki la nang kiew sted haki kam ialehkai sports bad wanrah ruh ïaka nam ka burom ïaka jylla da kaba wan rah ïaki takma ha ki jingïalehkai bapher bapher bad ha kane ka kynti kaba mynta 14 ngut ki khun Samla jong ka Jylla ki ba la leit ban ïashim bynta sha ka lympung ïa kura kaba la tip kum ka 2nd International Kick Boxing Woko Tournament Cham-pionship kaba la long ha Nongbah Delhi ki la ioh ban khur haduh 7 tylli ki takma Ksiar, 3 tylli ki takma Rupa, 3 tylli ki takma Rnong bad uwei u la wan ha ka kyrdan kaba 5.
Ïa ka kynhun kitei ki samla ïalehkai la pdiang burom da ka KSU North Khasi Hills District hapoh ka jingïalam u Samla Lambok Rymbai bad ki dkhot mynta ka sngi ha Nongpoh hadien ba kila wanphai noh shaka jylla ryngkat ka jingpynkup burom da ki jaiñ bad momentous sha ki rang bad thei ïalehkai ryngkat ki coach kiba la wan ban synran lang.
Haba kren sha ki lad pathai khubor, na ka liang u Bah Lorenso P Warjri Working President Meghalaya State Kick Boxing Association u la pynpaw ka jingkmen ban iohi ba ka KSU ka kynmaw ban pyndon burom ïa kine ki samla ki ba la wan rah nam ïaka jylla Meghalaya bad kane kan dang ai mynsiem ïaki samla ba kin dang ïai Minot shuh shuh ryngkat ka jingkmen kaba khraw ba baroh ki samla kiba la leit ban shim bynta ha katei ka lympung kila ioh ban khur takma.
U la ong ruh ba naduh ba naduh ba la sdang ïa kane ka jingïalehkai Kick Boxing ha u snem 2017 ki rang bad ki thei ialehkai ka jylla ki la ioh ban wanrah haduh 68 tylli ki takma ksiar 44 tylli ki takma Rupa bad 64 tylli ki takma rnong bad haba kheiï haka jingïalehkai shabar ri (International) ki la ioh ban wan rah haduh 33 tylli Takma na bynta ka ri.
Ha kawei pat ka bynta naka liang u Bah Lorenso P Warjri u la pynpaw ka jingsngew bynñiaw halor ka jingbym phai khmat ka sorkar ïaki rang bad thei ïalehkai Kick Boxing ha kaba kim ju ioh kano kano ka lad jingïarap naka sorkar bad kim ju ioh lad wat tang ban leit kynduh hynrei kum u nongïalam ka kynhun un nym shong kli kti ban kyntiew ïaki samla ïalehkai kiba don ka sap bad khamtam kiba ju wanrah ïaka nam bad burom ïaka jylla baroh kawei.