Rung semi-final ka Meghalaya, Nagaland, Manipur bad Mizoram ha ka NEOG 2022

0

Shillong, Naiwieng 09 : Ka Meghalaya, Mizoram bad ka Nagaland ki la ïoh rung sha ka semi-final jong ka kyrdan U-21 ki shynrang ha ka lympung ïalehkai 2nd North East Olympic Games 2022 kaba dang ïaid shaphrang mynta ha nongbah Shillong.
Ka Meghalaya ka la rung sha ka semi-final da kaba pynliem da 6-0 kol ïa ka Arunachal Pradesh na ka Group 2 ha ka jingïalehkai kaba nyngkong ha madan Third Ground, MFA, Polo, Shillong.
Ïa kitei ki hynriew kol la thep da u Everbrightson Mylliempdah (8 min), Figo Syndai (39, 62 min), Damonlang Pathaw (41 min), Dajiedlang Wanshnong (57 min) bad u Nelson Rymbai (79 min).
Ka Mizoram, ka la pynliem kumjuh da 6-0 kol ïa ka Assam na ka Group 1 ha kaba u Joseph Lalvenhima u thep hat-trick (18’P, 25, 37 min) shwa ba un thep sa ïa ka shi kol ha ka 66 minit jong ka kylla miet. Ïa ki ar kol pat la thep da u K Lalrosanga (47 min) bad u Rohlupuia (51min).
Ka Assam ka la mad ruh ka nam rem ha ka jingïalehkai sdang ha ka Manipur bad kyllem noh ha katei ka lympung, katba ka Mizoram bad Manipur kidei ki ar tylli ki team na ka Group 1 kiba la ïoh rung sha ka semi-final, hynrei ban bat kyrdan ba nyngkong lane ba ar kitei ki ar tylli ki team kin hap ban ïakhun pyrshah ha ka sngi Thohdieng.
Ha ka jingïalehkai kaba khatduh ha ka sngi ba ar, ka Nagaland ka la buh jaka ïalade sha ka semi-final da kaba pynliem da 4-0 kol pyrshah ïa ka Sikkim. Kiba la thep kol ki long u Yhoto Lohe (19 min), Thulunso (35 min), Hivika (55 min) bad u Pursunep (88 min).
Hadien ba ka la mad nam rem da 6-1 kol ha ka Meghalaya ha ka jingïalehkai ha ka sngi Nyngkong, ka Sikkim ha ryngkat ka Arunachal Pradesh ki la duh rung sha ka semi-final. Hynrei, kitei ki ar tylli ki team kin ïakhun ban knieh ïa ka nam ba lai na ka Group 2, katba ka Meghalaya kan ïakhun pyrshah bad ka Mizoram ban knieh rung phainal.
Ka jingïalehkai mynta ka sngi jong ki U-17 ki kynthei, ka Arunachal Pradesh kan ïakhun pyrshah bad ka Mizoram ha ka Group 2 ha ka por 11 baje mynstep, bud pat sa ka Sikkim pyrshah ïa ka Manipur na ka Group 1 ha ka por 3:30 baje janmiet.

Leave A Reply

Your email address will not be published.