Ka jingïoh bat jong ka seng Saiñpyrthei Bharatiya Janata Party (BJP) ïa u lakam synshar ha ka ri India la ar samoi kynthih hapoh ka jingïalam jong u Narendra Modi ka la pynktha khlieh ïa ki seng saiñpyrthei ha kiba bun ki jylla ka ri India. Ha Meghalaya ka BJP haduh mynta ka don arngut ki MLA bad ka jingïatreilang hapoh ka Sorkar Meghalaya Democratic Alliance (MDA) ba ïalam da ka National Peoples’ Party (NPP) kaba long ka paralok ha ka Sorkar synrop jong ka BJP hapoh ka shatri jong ka National Democratic Alliance ka pynpaw ba ka NPP ka shu long tang ka Sorkar tynshop kaba shah khyrwait shabi ha ka BJP na Delhi.
Kiba bun ki daw ba ki paidbah ki la bishar bha ïa ka jinglong tyngshop jong ka NPP hakhmat ka BJP. Kane ka la paw pyrthei naduh ka por ba ki Myntri Sorkar bad ki nongïalam ka BJP ki la wan sakhi ïa ka jingpynsmai Myntri ha u Conrad K. Sangma bad ia ki 12 ngut ki synran ha ka jingïalang kaba la long ha phyllaw jong ka Raj Bhavan ha u snem 2018.
Sa ka MP jong ka NPP na Tura Lok Sabha Constituency ka Agatha K. Sangma ka la kyrshan ïa ka jingpynbeit thymmai ïa ka aiñ-rew Citizenship Amendment Bill (CAB) 2019 ba la wanrah da ka BJP ha Parliament wat hapdeng ka jingpyrshah kaba jur na ki paidbah nongshong shnong ka jylla Meghalaya, na ki jylla ka North East bad na kiwei pat ki jylla jong ka ri India.
Sa kawei ka daw ngi ïohi ba ka dei ka jingpyrshang jong ka Sorkar BJP ban khroh ïa ki paidbah nongshong jong ki jylla ka thaiñ Shatei Lammihngi kynthup ruh ïa ka jylla Meghalaya da kaba pynsdang shaid shaid ïa ka jingïapynbeit pud.
Kane ka jingpyrshang jong ka BJP ka long ban ïoh khur ïa ka vote ha ka samoi elekshon ha u snem 2023 ha kane ka Jylla Meghalaya. Ka NPP ruh ka shim kabu lang ha kane ka jingïapynbeit pud namarba ka dei ka seng saiñpyrthei kaba bat ïa u lakam synshar bad ngi ïohi ba u Myntri Rangbah ka Jylla u Conrad Kongkal Sangma, u Symbud Myntri Rangbah u Bah Prestone Tynsong, ki MLA bad ki MDC ka NPP ki da put turoi haduh katta katta ba ka dei ka party kaba shlur bad kaba nud ban tare ïa ka kam ïapynbeit pud kaba la thaiñ sohkyrdot bha la san phew snem kynthih. Ka NPP ka da beiñ ruh ïa ka Sorkar Congress hapoh ka jingïalam jong u Dr. Mukul Sangma uba la kylla rong mynta sha ka Trinamool Congress ba um shym la nud ban tare ïa kane ka mat kaba jwat ban ïapynbeit ïa u pud u sam hapdeng ka Meghalaya bad ka Assam.
Ka BJP ha Meghalaya ka put turoi beit da ki skhim kiba ka Sorkar Pdeng ka la theh sha kane ka jylla katba ka NPP ka nang muja ban shim kabu ei tang ban myntoi ïalade ha ka saiñpyrthei.
Ki kynhun bapher bapher ha Meghalaya ki la pynsngew ïa kiba bun ki mat sha ki tyndong skhor jong ka Sorkar Pdeng hynrei kine ki jingdawa ki shu sahkut ha ki Almari jong ka Ministry of Home Affairs namarba ka Inner Line Permit kam shym la urlong satia wat haduh mynta mynne katba ha Manipur la pyntreikam mar mar ïa ka Inner Line Permit hadien ba ka BJP ka la ïoh bat ïa u lakam synshar. Nalor ka ILP, sa ka jingdawa ban pynrung ïa ka ktien Khasi bad Garo ha ka Khyrnit Baphra jong ka ri India ruh ka dang sahteng haduh kine ki sngi watla ka Ktien Khasi bad Garo ki la dei ki ktien kiba la dei hok ban ïoh ïa ka jingithuh ba ïaryngkat kyrdan bad kiwei pat ki jait ktien ha ka ri India.
Dang shen ka jingmih khubor ba ki MLA ka NPP bad na ka Trinamool Congress kin sa leit pynïasoh ïalade sha ka BJP ka la pynskuiñ bha ïa ki riewpeit pyrman ba haduh katno ka BJP kan lah ban pynjop ïa ki Sitting MLA ki ban sa ryngkang sha ka BJP tang shu la pynbna ka Election Commission of India ïa ka tarik pynlong elekshon ha Meghalaya.
Haba bishar ïa ka jinglong jingman jong ka saiñhima sima ha kane ka jylla Meghalaya, ki paidbah nongthep vote kim da peit than ïa ka Party hynrei ki peit beit ïa u briew uba ki kham noh ka mon. Kiba ieid party lehse lah ban ong ba ki don sa tang lai phew na ka shispah eiei. Hynrei kiba bun ki peit ïa uba kham ïoh ka jingkyrshan bad uba kham biang ka pariah parai bad uba kham lah ban pynkham bai sha de khyndiat khynsoit.
Mynta ka shong sa ha ki paidbah kumno ban jied namarba ka BJP kam pat ju jop satia ha ki Constituency kiba shabar ka sor Shillong kat haduh mynta. Ki ar tylli ki Constituency kiba ka BJP ka la jop ki dei hi ki Constituency kiba na nongbah Shillong. Kane ka pynpaw ba ki paidbah kiba don sha kiwei pat ki Constituency kim pat imon ïa ka party BJP watla ka dei kaba bat ïa u lakam synshar ha ka ri India bad ha kiba bun ki jylla ha ka ri.
Ka jingkylla rong Trinamool Congress jong ki MLA ka Seng Congress kan pynktha khlieh bha ïa ka BJP ha ka elekshon 2023 namarba ka TMC ka la trei borbah bad ka la rung sha manla ki kyndong kynshrot jong ka jylla bad ka jinglong jingman jong ka saiñhima sima ha kane ka jylla ngin sa nang ïohi shuh shuh ha ka aiom Tlang shwa ban leit sha ka elekshon namarba ka jingïarung ïa mih bad ka jingïaryngkang dieng kper kan jur bha nangne shakhmat.
