Guwahati, Kyllalyngkot 6: Ka Tnad Fisheries, hapoh ka Tnad Fisheries, Animal Husbandry bad Dairying jong ka sorkar pdeng, ka la pynlong ïa ka ‘Northeastern Region State Meet’ ka sngi ban peit bniah ka jingpyntreikam ïa ka Pradhan Mantri Matsya Sampada Yojana (PMMSY). bad na ka liang ka sorkar pdeng ka la mang ruh 50 tylli ki skhim hapoh kane ka PMMSY kaba long ruh 50 klur tyngka ka pisa.
La pynïaid da u Myntri Sorkar Pdeng Rajiv Ranjan Singh, bad la sakhi ka jingïadon lang u George Kurian, Myntri Khynnah ba dei khmih ïa ka MoFAH&D, Prof. S.P. Singh Baghel, Mo FAH&D bad kiwei kiwei ki kynrem ki lyndan na ki jylla ka thaiñ shatei lammihngi ha kane ka jingïalang.
Ha ka jingkyntiew kaba kongsan ïa ka kam ri dohkha ha ka thaiñ shatei lam mihngi, u Myntri Sorkar Pdeng u la plie paidbah bad buh maw nongrim na ka bynta 50 tylli ki projek ha ka jinglut kaba T. 50 klur, kynthup ka bynta jong ka sorkar pdeng kaba long T. 38.63 klur.
La saiñdur ïa kine ki sienjam ban pynïar ïa ki jingdon jingem ba ïadei bad ka kam ri dohkha ha ka thaiñ, ka jingseisoh bad ki lad ïoh kam ïoh jam. Ka Assam ka ïoh 12 tylli ki skhim, Manipur 7, Meghalaya 1, Nagaland 3, Tripura 3 bad ka Sikkim 24 baroh 50 tylli.
Napdeng kine ki projek ha Assam kadei ka jingplie ïa ka Integrated Aqua Park ha Darrang District, kaba la antad ban pynmih 150 MT ka dohkha ha ka shi snem, ka ban pynmih jingkamai T. 10-15 klur bad plie lad ïoh kam haduh 2,000.
Ka Jaka ri Dohkha ha Kamrup District kan pynmih 20,000 MT ki jingbam ha ka shi snem, katba ki projek pynmih symbai dohkha ha ki district bapher bapher ki thmu ban pynmih 50 million ki symbai dohkha ha ka shi snem, ka ban kyntiew ïa ka kam ri dohkha ha ka thaiñ.
Ka Manipur kan sakhi ka jingplie ïa ki jaka pynmih thah bad ki jaka buh pyndait thah ha Thoubal bad Imphal District ban pynneh pynsah ïa ki dohkha bad pynduna ki jingduh nong hadien ba la lum.
Shuh shuh, ki jaka pynmih symbai dohkha kiba pynmih ïa ki donkha ba kongsan ha ka thaiñ kin noh synniang sha ka jingpynneh pynsah ïa ki jingdon jingem ka mariang ban pynïar ïa ka kam pynmih dohkha ha ka jylla.
Ki projek ha Meghalaya kin phaikhmat ban kyntiew ïa ki jaka ri dohkha ha East Khasi Hills District. Kane ka sienjam, kaba phai sha ki jaka kiba don ha ki jaka jngohkai ba pawnam, la antad ba kan khring ia ki nongwan jngohkai, ka ban plie lad ïoh kam ha ka thaiñ bad kyntiew ïa ka kam jngohkai jong ka thaiñ.
Ki lai tylli ki projek ha Nagaland kin kynthup ka jingshna ïa ki jaka pynmih symbai dohkha ha Mokokchung bad Kiphire district. Kine ki jaka pynmih symbai dohkha kin pynmih 21 million ki dohkha ba dang rit ha ka shi snem, ka ban kyrshan ïa ka kam ri dohkha ha ka thaiñ bad plie ki lad kamai kajih ïa ki briew ha ka thaiñ.
Ha Tripura, ki projek kin kynthup ka jingplie ïa ki jaka ri dohkha bad ki jaka pynmih symbai dohkha.Kine ki sienjam ki thmu ban pynbun ïa ka jingpynmih ïa ki dohkha, bad plie ki lad ïoh kam ioh jam.
Ka Sikkim kan pyntreikam 25 tylli ki projek ba kynthup ka jingplie ïa ka Recirculatory Aquaculture Systems (RAS) ban kyntiew ïa ka kam ri dohkha kaba ïaineh, ka jingshna ïa ki jaka die dohkha ha Gangtok bad kiwei kiwei ki sorbah, bad ka jingkyntiew ïa ka kam ri dohkha. Kine ki projek kin kyntiew ïa ka ïoh ka kot bad ki lad kamai kajih jong ki briew ha ka thaiñ.
Ka thaiñ shatei lam mihngi ka long kaba kongsan ha ka jingïaid lynti ka India sha ka jinglah pyndap ïalade ha ki kam dohkha, bad ka dei ka dak jong ka jingkut jingmut jong ka Sorkar na ka bynta ka roi ka par ïa baroh.
Namar ka jingbun ki jaka shong um bad ka jingbun ki jait jingim kiba im ha ka um, ka thaiñ shatei lam mihngi ka dei ka thaiñ kaba bun bha ki lad bad ka jaka pdeng jong ka roi ka par hapoh ka jingïalam lynti jong ka Sorkar.
La ithuh ïa kane ka thaiñ kum kaba riewspah bha ha ki jingthung bad ki mrad, bad kumta kane ka thaiñ ka long kaba kongsan bha ha ka rukom treikam jong ka India na ka bynta ka jingkiew ka ïoh ka kot bad ka jingkyntiew ïa ka kamai kajih.
