Da kaba byrngem, lum pisa beaiñ ki 2 ngut na ki trai jaka ba ïoh bailutksan ban shna surok SWB

Shillong, K’ Lyngkot 06: Ka HYC hadien ba la ïoh ki jingujor na ki paidbah pyrshah ïa ka jingdawa pisa beaiñ u Bah Phidensing Thabah bad u Bah Rojen Khyllait kiba la kynnoh ba ki la donkti ban shim ïa ka pisa na kiba ïoh myntoi kiba dei ruh ki trai khyndew kiba la ïoh ïa ka pisa kum ka bai lutksan bai jaka na ka ophis Deputy Commissioner East Khasi Hills District na ka bynta ban shna ïa ka surok 2-Lane with Paved Shoulder jong ka Shillong Western Bypass (SWB) kaba hapoh ka section 23 ka RFCT-LARR Act, 2013, ha ka sngi nyngkong ka la leit ban ujor sha ka ophis Deputy Commissioner EKHD.
Hadien ba la ïakynduh ïa ka DC na ka liang u President ka HYC Sohïong Zone u Bah Purningstar Shabong bad u President ka HYC Nongthliew Circle u Bah JoplangKharnaior, haba kren sha ki lad pathai khubor ki la ïathuh ba kawei ka nongïoh myntoi kaba la ïohpdiang ïa ka bai lutksan ha ka 31/05/2024 kaba long T. 1,73,54,877/- klur bad T. 1,73,82,129/- klur, hynrei la kynnoh ba u Bah Phridensing Thabah, ha ka 03/06/2024 u la sei ïa ka pisa napoh ka Account number jong ka kumba T. 73,95,149/- lak bad kumjuh ruh T. 21,03,219/- lak lyngba ka cheque number 7239 bad 7240 khlem ka jingtip bad ka jingmynjur jong ka.
Shuh kitei ki nongïalam ka HYC ki la ïathuh ba sa kawei ka nongïoh myntoi kaba la ïoh ïa ka bai lutksan napoh ka ophis DC ha ka 31/05/2024 ka pisa T. 13,20,937/- lak, hynrei la kynnoh ba u Bah Rojen Khyllait ha ka 05/06/2024 u la sei ka pisa napoh ka account jong ka, kumba T. 2,47,125/- lak lyngba ka Cheque number 17643 kane ruh u la leh khlem ka jingtip bad ka jingmynjur jong ka.
Sa kawei pat ka nongïoh myntoi ka bai lutksan na ka jingdie ïa ka jaka ha ka 19/03/2024 ka la ïoh T. 20,82,441/- lak bad T. 15,04,800/- lak, hynrei la kynnoh ba u Bah Rojen Khyllait ha ka 02/04/2024 u la sei ka pisa napoh ka account jong ka T. 3,58,724/- lak lyngba ka CTS 000013153 khlem ka jingtip bad ka jingmynjur jong ka.
“Kine baroh ki la jia naba kitei ki arngut kiba la sei ïa ka pisa na kiba ïoh jingmyntoi ka dei namarba ki la pynbeij ba ki dei ban ai ïa ki blank cheque na ka bynta ban pyndonkam ha ki ophis bad ki dawa ruh ba manla kiba ïoh myntoi ki dei ban siew ka pisa kiba 10 per cent shaneng kaba la poi ruh shaduh ka 27% na baroh ka pisa kaba ki la ïoh na ka bailut ksan ha kaba ïadie jaka na ka bynta ban shna ïa kane ka surok,” ong ki nongïalam ka HYC.
Ki nongïalam ka HYC ki la ïathuh ba kine ki nongïoh jingmyntoi kim bna ne tip eiei shaphang kata ka per centage naba ki dei ruh ki briew kiba khlem nang khlem stad bad haba kylli ka seng ki la ïathuh ba kim tip ïa kata ka dor jong ka per centage bad kumta ki la ngat ha ka shrip ka jingshah pynbeij jong kitei ki arngut.
“Kine ki arngut ki agent dawa pisa ki la pynkylla ruh ïa ka linement jong ka jingdei ban iaid ka surok ne ka Road Plan jong ka surok katba ki mon lada ki trai jaka kim treh ban ai sha ki ïa ka blank cheque ne ban siew ïa ka 10 per cent ka pisa na ka bai jaka. Katkum ka jingtip jong ka seng, kitei ki arngut ki briew ki la donkti ban shim ka pisa najan baroh ki tari jaka kiba dei ki nongïoh myntoi ka bai lut ksan jaka bad bun na kiba ïoh myntoi ki tieng ban wan shakhmat ban ujor sha ki bor ba dei khmih naba ki la shah byrngem ba kim dei ban leh kumta bad lada ki ujor kin ngat ha ki jingeh kiba khraw,” ong ki nongïalam ka HYC, da kaba bynrap ka la dep don ruh ka jingjia teng mynshwa ba ka ophis na ka jingujor kine kiba dawa pisa da kaba ki la pyndonkam da ki buit babun jait, ka ophis DC ka la pynsangeh shipor ban siew ïa katei ka bai lutksan, hynrei hadien ka jingtuklar ka seng kitei ki nongïoh myntoi ki la ïoh biang.
Kumta na ka liang baroh artylli ki seng ka HYC ki la ïathuh sha ka DC da kaba ong ba kane ka dei ka kam kaba khia bha bad ka dei ka jingbam sap kaba shyrkhei ba la leh da kitei ki arngut ki briew kiba la shim kabu na ki briew kiba lui lui.
“Ngi kyrpad ïa ka DC ba kan pynlong da ka jingtohkit halor kane ka kam bad ban pynshitom da kaba tyngeh pyrshah ïa ki katkum ki aiñ kiba donkam. Ngi kyrpad ruh ïa ka DC ban pynlong ka jingtohkit kaba bniah bha na ki ophisar jong ka DC ophis lada don kiba donkti ne ïoh kim don kiba donkti halor kane ka kam bam sap kaba shyrkhei,” kyrpad kitei ki nongïalam ïa ka Deputy Commissioner ka East Khasi Hills District.
Na ka liang kine ki artylli ki seng ki la leit ruh ban ai kopi ïa kane sha ka DGP, sha u SP bad sha ka tnat. Kine ki ar seng ki la ong ba ïamynta kin ap shwa ïa ka ophis DC ban shim khia ïa kane ka kam bad na ka liang ka seng kan ym shongkli kti halor kane ka kam bamsap bad ka kyrpad ruh ïa kiwei ki trai jaka kiba la ïoh ïa ki bai lutksan ba kin mihshakhmat ban ujor lang da kaba kyrpad ruh ïa kito ki trai jaka kiba la dep ban ai ki jingujor sha ka seng ba kin ïeng lang beit tylli bad ka seng haduh ban da lah pynurlong ia kane ka kam.