Khliehriat, K’Lyngkot 06: Kumba ju long man la u snem, mynta u snem ruh u Deputy Commissioner East, Jaiñtia Hills District, lyngba u kyrwoh u pynbna ba ha ka 11 tarik mynta u bnai kyllalyngkot 2025 kan dei ka sngi shuti ha East Jaiñtia Hills District na ka daw ka jinglehkmen tamasa Nul-Ding-Kut ( kaba dei ka jinglehkmen ban pynthymmai ïa la ka jingim).
La ong ba baroh ki tnat treikam kiba dei jong ka sorkar Meghalaya ba kynthup ruh naduh ki Bank, ki jaka pule, ka ïingbishar (Magisterial Courts) kin khang ha katei ka sngi.
Kum ban shu pynkynmaw, kane ka tamasa lehkmen Nul Ding Kut ka dei ka jinglehkmen jong ki jaitbynriew Biate kiba dei ki nongshongshnong jong ka jylla Meghalaya, lah ruh ban ong ba ka dei kawei na ki lariti jong ki jaitbynriew Biate kaba ki jul leh naduh ki por u men barim bad ïa kane ka jinglehkmen ki dang leh haduh mynta ruh.
Katkum ka jingngeit jong ki jaitbynriew Biate, katei ka jinglehkmen Nul Ding Kut ka dei ka sngi ba kyrpang ïa ki kum ka sngi ba ki ju pynthymmai ïa ka jingim, ïa ki jingmut jingpyrkhat lah ban ong ka dei ka tamasa kaba dap da ka jingleh kmen bad ka jingia ieid iwei ïa iwei bad ïa kane kum kane ka tamsa ki ju pynlong ha ka shnong kiba don ha ka thaiñ Saipung, East Jaiñtia Hills District.
