ïap 3 ngut ki Pastor bad mynsaw bun ngut ha ka jingther kuli ki suba lehnoh ïa ki kali ha Kangpokpi, Manipur

Imphal, Jymmang 13: Kumba laingut ki nongïalam niam Christian kiba dei ki Pastor jongka Balang Baptis Manipur ki la shah siat iap bad katto katne ngut pat ki la mynsaw hadien ba la suba ba ki kaikhlaw ki la thombor bad ther kuli na phang ïa ki ar tylli ki kali kiba kit ïa ki dkhot jong ka Thadou Baptist Association (TBA) ha ka District Kangpokpi jong ka Jylla Manipur. Kane ka jingjia ia ki Nongialam Niam ka la pynshong syier ïa ki paidbah bad la khang ruh ïa ka surok bah (NH-2) kaba dei ka surok ka ba kongsan jong ka jylla.
Ki lanot ki kynthup ïa u General Secretary barim ka Manipur Baptist Convention (MBC) u Rev. V. Sitlhou, u Rev. V. Kaigoulun, bad u Pastor Paogoulen.
Ki tyllong khubor ki ïathuh ba kitei ki lanot ki dang wanphai sha Kangpokpi na ka Churachandpur district hadien ba ki la leit sha ka jingïalang jong ka TBA ha Lamka ha kaba ki kaikhlaw ki la thombor ïa ki kali jong ki hapdeng ka thaiñ Kotzim bad Kotlen.
Ym duna sa 5 ngut kiwei pat ki la mynsaw ha katei ka jingshah thombor bad ki dang shah sumar. La ïathuh ba kiba la mynsaw ki kynthup ïa u Rev. S.M. Haopu, u Rev. Hekai Simte, u Rev. Paothang, bad 2 ngut ki nongniah kali kata u Lelen bad u Goumang.
Katei ka jingshah thombor ka la wanrah ka jingbitar ha kylleng ki jaka ba shong ki jaidbynriew Kuki-Zo, ha kaba ka Kuki Students’ Organisation (KSO), Churachandpur District, ka la pynbna ban khang surok khlem pud sngi naduh ka por 12:30 baje mynstep jong ka 12 tarik Jymmang.
Ki nongïakhih ki la pakhang ïa ka surok bah NH-2, kaba la ktah jur ïa ka leit ka wan kaba pynïasoh ïa ka Manipur sha Nagaland bad kiwei pat ki bynta jong ka thaiñ.
Ha ka kyrwoh, ka KSO ka la pynrem ïa kane ka jingthombor kum ka ka jingpynïap beiñ ïa ki nongïalam Balang TBA kiba lui lui bad ka la kynnoh ïa ka jingbym lah jong ki bor Sorkar ban tehlakam ïa ki kam thombor ha kane ka thaiñ.
Ki jingshakri kiba kongsan, kynthup ïa ki jingdonkam kyrkieh ha ka liang ka koit ka khiah, ka bording, ki jingtreikam jong ki lad pathai khubor, bad ki jingleh niam, la pyllait naka pakhang shnong.
Ka Kuki Inpi Manipur (KIM), kaba dei ka apex body jong ki jaitbynriew Kuki, ka la pynrem jur ruh ïa kane ka jingjia, da kaba ong ba ka dei ka jingleh riewkhlaw kaba thombor ïa ki nongïalam Balang bad ki riew paidbah ki bym don tiar ïaleh.
Ka KIM ka la kdew ba dang shen u Rev. V. Sitlhou u la ïashim bynta ha ka jingïakren ïasuk bad ka Nagaland Joint Christian Forum (NJCF) ha Kohima kaba thmu ban kyntiew ïa ka jingïasuk bad ka jingïasngewthuh jingmut hapdeng ki jaidbynriew.
Da kaba khot ïa ka jingshah pyniap kum ka jingshah thombor ha ki jingpyrshang ban ïasuk kiba dang ïaid shakhmat, ka seng ka la kyntu ïa ka Sorkar India ban pynlong ïa ka jingtohkit kaba bniah ban pynthikna ba kito kiba donkti kin shah pynngat ha ka aiñ.
Hadien katei ka jingshah thombor, la ïathuh ba ki bor Sorkar ki la pynbun ïa ki bor pahara ha katei ka jaka. Kane ka jingjia ka la pynjur shuh shuh ïa ka jingïakynad bad ka jingbym ïasngewthuh jingmut ha ki jaka lum jong ka Manipur, ha kaba ki jingïakynad hapdeng ki jaidbynriew bad ki jingshah thombor ba man ka por ki la ïai bteng ban pynthut ïa ka jinglong jingman.