5.95 lak metric ton u dewïong ba ladep die lilam da ka Coal India Limited

Shillong, Jymmang, 21: Haduh 5.95 lak na ka 14.10 lak metric ton u dewïong ladep ban die lilam da ka Coal India Limited (CIL) bad ka jingkit bad shalan ïa u dewïong bad kiwei kiwei de ki kam na ki jaka ba la lum thup ïa u dewïong ka dang ïaid shakhmat.
Ïa kane la pyntip da u Secretary ka tnat Mining and Geology ka Sorkar Jylla u Bah E. Kharmalki ha ka jingpyntip paidbah ba la pynkih ha ka 16 tarik mynta u bnai.
Katkum kane ka jingpynbna paidbah, la pyntip ba ka jingdon jong u dewïong, hadien ba la pynkut ïa ka jingsorjamin (ka jingkhmih bniah/ka jinglum jingkheiñ da kaba pynher da ka drone, ka jingleit pynshisha da ka met lane baroh ar) la pynlong ha baroh kawei ka jylla (ha u snem 2022-2023) la lap ba u dewïong u don 14,10,710.41 metric ton.
La pyntip ruh na ka jingdon jong u dewïong haduh 14,10,710.41 metric ton, u dewïong ba la dep die lilam da ka Coal India Limited (CIL) u long 5,95,323.775 metric ton bad ka jingkit bad shalan ïa u dewïong bad kiwei kiwei de ki kam na ki jaka ba la lum thup ïa u dewïong ka dang ïaid shakhmat.
“Ka jingdon jong u dewïong ba dang sah ka long 8,15,386.635 metric ton ïa uba shen yn sa die lilam hapoh ka por ba la buh,” la ong ka jingpynbna paidbah.
Ha kaba ïadei bad kane, ka jingpynbna paidbah ka la pyntip sha baroh ki trai dewïong ba ladep lum jingkheiñ/ba ladep sorjamin, ïa u bym pat die lilam, ba baroh ki trai dewïong kiba hap hapoh ki bynta ba dang dei ban shim jingkheiñ la bthah ba kin aplai noh mardor ïa ka transit pass (TP) na ki ophis jong ki Deputy Commissioner jong ki distrik, khnang ban pynkit ïa u dewïong na ki par/ki thliew sha ki jaka lum thup ba la ithuh da ka CIL.
Ka tnat ka la pyntip lada lap ïa u dewïong ba la lum shabar na ka thup jong ka jingshim jingkheiñ bad na ki jaka ba la kdew, yn shu kurup beit bad yn pynshitom pyrshah ïa ki trai dewïong hapoh ki kyndon jong ka MMDR Act, 1957.
“Lada jia lap ba ym don dewïong lane ka jingdon dewïong ka duna na kaba la shim jingkheiñ na ki trai dewïong, yn pynshitom pyrshah ïa ki trai dewïong katkum ki kyndon jong ka MMDR Act, 1957,” la ong ka jingpynbna.
Shuh shuh, ka jingpynbna paidbah ka la ong, “shisien ba la kut ka jingdie lilam ïa u dewïong ba dang sah 14,10,710.41 lakh metric ton, ïa u dewïong ba shu lum thup lane lada lap ba shu lum shabar na ka jaka ba la buh yn kurup mardor da ka Sorkar bad yn die lilam da ka Sorkar bad ïa ka pisa kaba mih yn thep sha ka khajna jong ka Sorkar, bad ka jingkitkhlieh kan long ïa u trai dewïong, ha kaba un ym lah ban kam trai halor ka dor die ba la die lilam.”