Shillong, Jymmang, 21: U nongïalam ka BJP ha ka jylla ba dei ruh u MDC ka Tura u Bernard Marak ha ka sngi U Blei u la ong ba ka party ka kyntu ïa baroh ki nongtrei party na ki shnong bapher bapher ba kin thaw ïa ki komiti ha baroh ki gram sevak circle ban peitngor ïa ka jingpyntreikam ïa ki skim ka sorkar pdeng.
Ïa katei ka rai la shim hadien ka jingleit jngoh ïa ki shnong kiba hap ga Rongram Block ha ka sngi u Blei.
“Ha ka jingleit jurip jong ngi, la pyntip ïa ngi ba ki don bun ki shnong hapoh kawei ka gram sevak circle kiba khlem shah kynthup ha ka skim JJM, PMAY, SAUBHAGYA, PMGSY bad kiwei kiwei. Ki don ruh ki shnong kiba sah ha ka jingdum namar ym pat poi bording bad ki khlem shah kynthup ha ka skim pynpoi bording ha nongkyndong ïa kaba la tip kum ka SAUBHAGYA (Pradhan Mantri Sahaj Bijli Har Ghar Yojana),” u la ong.
Shuh shuh u ong ruh ba ki don kiba ujor ba ym don satia ki surok hapoh ka skim PMGSY bad ka jingbym pynbha ïa ki surok.”Ki don ki nongshong shnong kiba khlem shah kynthup ha ka skim bai bam tymmen bad ki nongrep ruh ki khlem ïoh jingïarap na ka skim nongrep PM KISAN wat hadien ba ki la ïoh ïa ki ID,” ong u nongïalam ka party ha ka kyrwoh khubor.
La kynnoh ruh ba ki don bun ki nongshong shnong ki dang sah ha ki Ïing ba shu shna malu mala bad kim pat ïoh satia ïa ki ïing bha lyngba ka skim PMAY katba u ong ba ki don ruh kiba ujor ba kim ju ïoh tikna ïa u khaw ïohei.
Kumta, u ong ba la donk ban don ka jingïatrei lang hapdeng ki gram sevak bad ki block lym kumta ka jingduhnong dei ïa ki nongshong shnong.
Kawei pat ka jingkynnoh ka long ba ki don ki nongshong shnong kiba kam ba watla ki kyrteng ki la dep ban paw ban ïoh ïa ki skim bapher bapher hynrei kim pat ïoh satia.
“Kumta da kaba shim lang ïa kine ki jingujor baroh ngi la rai ban thaw ïa ki komiti ha baroh ki GS circles ban peitngor bad buddien ïa ka jingpyntrei a ki skim bapher bapher jong ka sorkar pdeng,” u la bynrap biang.
Nalor kata u ong ruh ba kin pynsngewthuh ïa ki shaphang ki skim bapher bapher khnang ba kan ym don kano kano ka jingsepei ban pyntreikam ïa ki skim ka sorkar pdeng. Utei u nongïalam ka party u ong ruh ba ki khot ki wer ïa ki dkhot na baroh ki shnong ki thaw ban ai ka jingïatreilang khnang ba kin lah pat ban phah ïa ka kynhun ban thaw ïa ki komiti.
