Shillong, Jymmang 21 : Ki nongïalam ka Congress ha ka jylla kim pat ïoh jingtip satia haba ïadei bad ka jingthmu leit pynïasoh NPP jong ki arngut ki MDC jong ka kiba don ha Khasi Hills Autonomous District Council (KHADC).
“Tad haduh mynta ngim pat ïoh jingtip satia halor kane ka jingthmu leit pynïasoh NPP jong ki arngut ki MDC jongngi hynrei ngi la shu ïohi tang ha ki lad pathai khubor,” ong u wei na ki nongïalam ka party Bah RV Lyngdoh (MLA, MDC) haba kren bad u Mawphor.
Lah ban kdew hangne ba dang shen la mih ki khubor ba kitei ki arngut ki MDC kiba mih kyrteng ki kynthup ïa u MDC ka Mawkyrwat Bah Carness Sohshang bad uwei pat dei u MDC ka Mairang Bah Batskhem Ryntathiang.
Watla kitei ki MDC kim pat kwah ban kren ei ei halor katei ka jingmih khubor hynrei ki khubor ba la ïoh lum ki ïathuh ba katei ka kam ka la ïaid shakhmat namar na ka liang ki nongïalam ka NPP ki la dep wat ban kynduh ïa ki.
Na ka liang ki nongïalam Congress ki pynpaw ruh ba haduh mynta kim pat ïakren ei ei halor katei ka bynta namar ki dang ap shwa la kadei neem ka jingshisha kumba la mih khubor.
Haba jubab halor ka jingkylli, utei u heh Congress u la ong, “Ngin sa shim ïa ka rai ha ka por kaba biang.”
Lah ban kdew hangne ki don haduh 6 ngut ki MDC Congress ba kynthup ïa u Bah PN Syiem, Bah RV Lyngdoh, Bah Gabriel Wahlang, Bah Charles Marngar, Bah Batskhem Ryntathiang bad Bah Carnes Sohshang.
