Ka jingwan ki briew ban jngohkai ha Laitlum, ka lad ban kyntiew pat ïa ki nongshong shnong: MLA Mawkynrew

Shillong, Jymmang 21: Ka jingdon ki jaka jngohkai ba itynnad ha Laitlum ka la khring ïa bun phew hajar ngut ki nongwan jngohkai pyrthei ym tang na kylleng ka Jylla Meghalaya hynrei na shabar jylla bad bar Ri India ruh kumjuh bad hapdeng kane ka jingwan tuid ki nongwan jngohkai pyrthei ki nongshong shnong kane ka thaiñ ki mad ïa ka jingkiew ha ka liang ka ïoh ka kot ruh kumjuh.
Don napdeng ki nongshong shnong kiba buh ïa ki dukan bam ha shi lynter ka surok sha katei ka jaka jngohkai, ki jaka sah, ki dukan die tiar, die jaiñ, ki mar rep bad kiwei pat ha kaba ki tourist kim kut tang ha ka jingwan jngohkai hynrei ki da pynlut pisa ruh ban thied jingthied ne leit bam ha kine ki dukan.
Kane ka la pynkylla ruh ïa ka rukom im ki nongshong shnong ha kaba ki pyrshang ban ïaksaid ban kynriah na kiwei pat ki kam kiba duna jingïoh sha ki kam ban ïohnong na ka kam jngohkai pyrthei.
Kawei na kine ki kam ka dei kaba la pyni nuksa da u Bah Wanbor Nongspung uba la seng ïa ka Food Processing Unit ban pynkylla ïa ki mar rep kum ki soh, u sying, u sohmrit khlaw, u shynrai, u musla bad kiwei pat sha ki mar kiba lah ban pyndonkam ha kawei pat ka rukom.
Ym tang katta ha kane ka Food Processing Unit kaba don ïa ki kor tylliat bad kiwei pat ki jait tiar ban pynkylla dur ïa ki mar rep, u Bah Wanbor u la buh ïa ka dukan ban die ïa kitei ki mar rep kiba la pynkylla sha ka umsoh, ki kynja musla ba la tylliat na u sying, u sohmrit bad kiwei pat ki mar rep.
U Bah Wanbor u la pynitynnad ruh ïa kine ki mar rep da kaba song bad thep bha ha ki bilor kata ryngkat ki jingthoh kyrteng ïa ki mar rep. ïa kane ka Food Processing Unit, u Bah Wanbor u la plie paidbah ha ka 19 tarik u Jymmang, 2023 da kaba khot ïa u MLA ka Mawkynrew, u Bah Banteidor Lyngdoh ban wan ot ribbon kum ka jingplie ïa kane ka dukan ha Laitlum. U trai dukan u la pynpaw ka jingsngew nguh ïa ka jingai kti u Bah Banteidor halor kane ka jingthmu bad lam lynti pat ban pynïoh jingïarap na ka tnad Horticulture ka Sorkar Jylla lyngba ka skhim Mission for Integrated Development of Horticulture (MIDH).
Haba kren ha kane ka jingïalang plie ïa kane ka dukan, u Bah Banteidor u la ong, “Kaei kaei kaba lah ban pynurlong ïa ka jingthmu ka dei ka jingmut kaba skhem bad ka jingïatreilang bad mynta ka sngi ngi ïohi ïa ka jingurlong ka jingangnud u Bah Wanbor”.
U la ban jur ïa ki nongshong shnong kiba wan sakhi lang ha kane ka sngi ban phai khmat sha ki kam da kaba shim kabu ïa ka jingwan hiar ki tourist sha kane ka shnong.
“Ki tourist kin wan shane ym tang ban jngohkai hynrei kin thied ruh ïa ki mar rep bad ki tiar kiba ki nongshong shnong ki pynmih na kane hi ka thaiñ”, u la ong da kaba pynpaw ba kum u nongmihkhmat hi u don ban ai mynsiem ban kyntiew ïa ka ïoh ka kot jong ki bad kum ka lad ai kam ïa kiwei ruh.
Ha kane ka sngi la wan ban ïadonlang ruh da ki ophisar na ka tnad Horticulture bad Agriculture, ki ophisar na ka Mawkynrew Block, ki nongïalam shnong nalor kiwei pat.