Kob ka VPP ïa kino kino kiba kwah ïatai nia halor ka Reservation Policy

Shillong, Jymmang 21: Ka Voice of the People Party (VPP) ka la pynpaw ïa ka jinglong ba la kloi ban ïatai nia ïa kino kino kiba kam ba ka jingdawa jong ka ban pynbeit thymmai ïa ka bhah thung ka long kaba bakla bad bym don nongrim.
Ha ka kyrwoh sha ki lad pathai khubor u Nongaiktien ka VPP u Dr Batskhem Myrboh u la ong ba u diengkot jong ka bhah thungkam ha ka jylla, kumba la pynbna ha ka 12 tarik Kyllalyngkot, 1972, ka dei beit beit halor ka jingbun briew ym da kiwei pat ki mawser.
“Ka seng VPP ka kob bad long ba la khreh ban ïatainia lada don mano mano ba ong ba ka jingdawa jong ka halor ka bhah thung ka long kaba bakla bad bym don nongrim. U diengkot jong ka bhah thungkam ha ka jylla, kumba la pynbna ha ka 12 tarik Kyllalyngkot, 1972, ka dei beit beit halor ka jingbun briew. Ka long kaba sngewsih ba baroh shi katta ïa ka bhah thungkam la pynshong nongrim ha ki khanasamari ba la shu antad ym katkum ka jingshisha. Ka seng VPP ka kwah ban wanrah ïa ka jingbhah kam halor ki jingkheiñ kiba thikna. Lada don mano mano ba pyrshah ïa ka jingdawa ba shonghok bad shongaiñ jong ka seng, kiba kum kita ki briew kim dei shuh tang ki bym pule hynrei kiba dang dum, kiba shahshilliang bad shun ïa ka jaitbynriew Khasi.” ong u Dr Batskhem Myrboh.
Ka seng VPP ka pynpaw ruh ïa ka jingbynñiaw kaba jur halor ka jingïathuhlypa balamler jong katto katne ngut ki nongïalam jong ka seng NPP ba hana lada pynkylla ïa ka bhah thungkam kan sa don ka jingïakynad jaitbynriew ha ka jylla. “Kaba kum kane ka jinglamler ka pynpohdor ïa ka jaitbynriew Garo la kum ba ki dei ki shitengkhlieh kiban shu khie wahleng wat ïa ka bym don nongrim ruh. Ngi pynrem jur ïa kaba kum kane ka rukom pyrkhat ramïa jong ki nongïalam ka seng NPP. Kine ki juh ki nongïalam ka NPP ki la kynshoit ruh ïa ki Khasi jong ngi hana ba kim ym pynleit jingmut eiei halor ka bhah thungkam bad shu pdiang beit kumba la pynïaid da ka sorkar. Kane ka pynhiardor ïa ngi ki Khasi tang kum ki lang matlah bad ki durbula ki bym don jabieng,” u la ong.
“Ha kawei pat ka liang, ka seng VPP ka burom ïa ka jaitbynriew Garo kum ka jaitbynriew kaba don la ka bor sngewthuh ban pynshongnia janai ïa kiei kiei baroh. Na ka liang ka seng, ngi kyntu ïa baroh ar jaitbynriew, Khasi bad Garo, ban pyrshah ïa kano kano ka rai kaba bakla bad shilliangkhmat jong ka sorkar bad ban ïa burom markylliang,” u la bynrap.
Haba ïadei bad ka jingkynnoh ba ka seng VPP ka leh politik ïa ka bhah thungkam na ka bynta ka ilekshon MDC ka ban sa wan ‘ka long tang ka nia khyllung khynnah.’ u la ong,
“Lada wanrah ïa ki mat ki jura kiba ktah matïong ïa ka jaitbynriew ka long ka bym bit ïa ki, kata ka dei ka kam shimet jong ki. Ka seng ka la kut jingmut triang ban ïakhun halor ki ishu kiba ktah ïa ka jaitbynriew bad yn ym don mano mano ba lah ban khang ne pynsangeh ïa ka. Lada kita kiba don ha ka bor kim lah ban tehlakam ïa ki jingeh jong ka jylla, kan jin da la bha ba ki hiar shuki noh; kim don hok ban bat ïa u lakam synshar haba ym don jinglah. Ka VPP kam dei tang ka seng saiñ pyrthei hynrei ka jingïakhih paidbah na ka bynta ban pynim pat, ban pynbha bad pynkylla dur ïa ka jylla Meghalaya. Ka jingïakhun jong ka seng ka long halor ki nongrim bad ym da ka jingpynbiej ïa ki paidbah da ka bor tyngka ne da kumwei pat.” u la ong.
Kum ka jingpynkynmaw, ïa ka seng VPP la wer sha ka jingïalang jong baroh ki seng saiñ pyrthei ha ka 19 tarik Jymmang, 2023 ban ïatai halor jong ka “reservation roster” bad ka seng ka la leit ban ïashim bynta.
“Kaba sngewsih ka long ba ha katei ka jingïalang ym shym la don kano kano ka jingïatai hynrei la shu shah hikai skul eiei khamakha ha ka sorkar halor ka rukom kheiñ ïa ka roster. Kane ka jingleh jong ka sorkar ka la pynbor ïa ka seng ban mih jyndat noh na ka jingïalang khamtam ha ba la sngewwthuh shai b aka sorkar kam ailad ban ïa kren halor ka policy bhahkam. Ka sorkar ka kwah beit ban pyntreikam ïa ka roster system da kaba shim jingkheiñ naduh ka snem 1972 kaba ka seng ka pyrshah horkit hordang.” u la ong.
“Ka long ruh kaba lyngngoh ngaiñ ba don na ki katto katne ki kynrem ki lyndan ki bym sngewthuh wat tang ïa ka jingmut jong ka kyntien party ruh. Namar ka jingsahdum jong ka, ka wei ka briew ka la ñiewbeiñ ïa ki dkhot ba ka seng ka la phah sha ka jingïalang tang namar ba kim dei kiba lah shah jied da u paidbah. Ka seng VPP ka ïapher na kiwei pat ki seng saiñ pyrthei namar ba ha kiwei ki seng baroh ki rai la shu hukum beit da ki minister bad MLA bad dei tang ma ki kiba dondor ha ka seng. Ha ka VPP kam long kumta namar ba baroh ki dkhot bad nongkitkam ki don la ka dor ban noh synñiang ryngkatlang bad ki MLA ne kiba lah shah jied da u paidbah. Jin da ka sorkar ka la pynbeit da ka dorbar kyrpang halor ka bhah thungkam kumba la dawa da ka seng VPP, khlempep ki MLA jong ka seng kin leit ban ïatai. Ka seng kam ngeit ruh ha ka nongrim ba tang namar ba ïoh sha ïoh ja maphot ban shu ïaleit jingïalang katba uba mon namar kane ka ktah ïa ka pisa jong u paidbah,” u la bynrap.