Leit jngoh u Myntri Rangbah da la ki jong ki khmat bad pynbna jingïarap 1 klur tyngka

Shillong, Jymmang 21 : U Myntri Rangbah ka Jylla u Conrad K Sangma, ula pynbna ban ai jingïarap daka song pisa ba T.1 klur ïa ka skul Khasi Jaiñtia Presbyterian Girls Higher Secondary School, Mission Compound, namar ka jingbam duh ka ding ïa ka ïingskul kaba la jia ha ka step phyrngap jong ka Sngi U Blei.
Ïa kane u Myntri Rangbah u la pynbna ha ka jingïakren bad ki nongthoh khubor bad ruh hakhmat ki nonghikai ha ka jingleit jurip ïa ka jingjulor jong kane ka ïing skul mynta ka sngi ha ka por dang step. “Kane ka skul kadei kaba la rim tam bad kaba don ka jingïadei ba kyrpang bad ka imlang ka sahlang bad kaba la ïeng mynta la 131 snem. I sangsot shi katdei eh ban peit ïa ka jingjulor jong kane ka ïing skul. Kum ka jingsdang ban tei thymmai pat ïa kane ka skul, 1 klur ngan ai jingïarap lyngba ka Chief Minister’s Special Development Fund,” ong u Conrad.
“Kane ka 1 klur kadei tang ka jingsdang ban tei thymmai pat ïa ka ïing skul, hynrei ngin sa nang shong pyrkhat shuh shuh khnang ba kane ka ïing skul kan ïeng biang. Ngi shanñiah ha ka managing committee ba kan pyrkhat la yn pynïeng biang da ka dur ka dar kaba rim lane da kaba thymmai,” la ong u Conrad.
U Myntri Rangbah u la pynpaw ruh ba ka jingpluh jong kane ka ïing skul ka la long ka jingduhnong kaba khraw ïa ki khynnah skul, ki nonghikai bad ïa imlang ka sahlang da kaba pynpaw ba kane ka skul ka la pynmih shibun ki riew shemphang.
Ha kane ka sngi u Myntri Rangbah u la ïoh ruh ban ïakynduh ïa ki nonghikai, ki khynnah skul bad ki nongïalam Shnong ha kaba u la ong ba na ka liang ka sorkar kan ïadon ryngkat bad ki bad ban ïatreilang.
Kum ban kdew hangne ba ka KJP Girls Higher Secondary School, kaba la tei naduh u snem 1892, kala kylla dpei ha ka step phyrngap jong ka sngi U Blei na ka jingbam duh ki thylliej ding kiba la klang ïa kane ka ïingskul.