48 kynta ai por ban pyndam ïa ka kyrteng ka Jhanika Siangshai

Khliehriat, K’lyngkot 31: Ka Khliehriat Block Congress Committee (KBCC), Youth Congress Committee bad Mahila Congress Committee jong ka Khliehriat ka la ai por 48 kynta ïa ka Meghalaya Pradesh Congress Committee (MPCC) ba kan pyndam ïa ka Kong Jhanika Siangshai kum ka kyrtong ban ïakhun na ka tiket jong ka Congress namar kane ka kyrtong kaba ka MPCC ka la pynbna kam dei shuh satia ka dkhot jong ka Congress.
Na ka liang ki dkhot jong ka party ki la kyntait ruh ban pdiang ïa ka kyrtong ba ïa ka kyrteng jong kane ka kyrtongba ka MPCC ka la pynbna namar kam dei shuh satia ka dkhot jong ka party.
“Ka Khliehriat Block Congress Committee ka dap da ka jingsngewsih bad sngewdiaw ka mynsiem ban ïohi ïa ka kyrteng ka Kong Jhanika Siangshai kum ka kyrtong ka party napoh 6-Khliehriat Assembly Constituency, ka jingleh ka MPCC ka la shu shimrai hi beit khlem pyntip bad ïa syllok shuwa ruh bad ki nongïalam bad ki noongtrei ka party ha ka block bad district level. Kane ka pyni ka jingbymsuit ñiew bad bym burom shuh ïa ki Nongïalam ka Block bad district level da ka MPCC,” ong Secretary ka KBCC u Bah Rimistar Dkhar.
“Hadien ba la ïohi ïa kane ka khubor ka Khliehriat Block Congress Committee (KBCC) lem bad ka Khliehriat Assembly Youth Congress Committee (KAYCC) bad ki Mahila Congress Committee, ki circle bad ki unit jong ka party ngi la ïalum kyrkieh ïa ka jingïalang ha ka Khliehriat West, da kawei ka jingmut ngi la rai ba ngim pdiang satia da leilei ïa kane ka kyrtong ba la pynbna da ka MPCC. Na ka liang jong ngi ngi aipor 48 kynta ïa ka MPCC ban weng ïa ka kyrteng jong ka kum ka kyrtong bad lada ka MPCC kam sngap ïa kane ka rai jong ka block ngim banse ban shim da kawei ka rai kaba tyngeh,” u la bynrap.
Shuh shuh na ka liang jong ka KBCC ka la buh jingkylli ha kano ka nongrim ka MPCC ka ai tiket ïa ka Kong Jhansi ka briew kaba la mih na ka party naduh u snem 2022. “Kumno ka MPCC ka buh kyrtong da ka briew kaba bein bad krenpoh ïa ka party bad ïa ki nongïalam jong ka naduh state haduh block level? Ïoh ka MPCC kam tip ba ka Jhanika Siangshai ka la phet noh ruh na ka party ha ka 23 Nailar 2022 bad ka la leit ban pynïasoh sha ka NPP ha ka 11 Nailur 2022,” u la ong.