Ha kine ki samoi san snem ba la synshar da ka sorkar MDA ïa ka jylla Meghalaya ba la lam khmat da ka party NPP, ki paidbah, ki kynhun sengbhalang bapher bapher lem bad ki lad pathai khubor ki la ïakren bha tang shaphang kata ka High Level shi High Level. Bun ruh ki bym sngewtynnad satia bad khohñïoh ïa ka namar baroh ki kam, la ki dei ki barit ne baheh, khamtam ki mat kiba ktah mationg ïa u paidbah bad ïa ka ri bad jaitbynriew la pyrkhat bad tuklar lut da kata ka High Level.
Ki buit poh jong ka Sorkar MDA baroh la pynïaid da ka High Level. Kaba rai ka High Level ka dei kaba biang lut nadong shadong bad ym don ba lah satia ban ïaleh pyrshah ïa ka. Ka High Level ka mih nyngkong eh ha ka por ba ïakhih ïa ka Them Metor ha Iew Mawlong. Hadien kata, ka la bteng bad kiew raibi pat ter ter kat man ki kam.
Ha ki kam khappud ruh, hap pyrkhat shwa ka High Level shwa ban ïasoi MOU bad ban pynsah ïa ka Block-1 bad Block-2 sha Assam. Ha ka jingsiat briew ha Mawlai ruh, imat ïa plan da kata ka High level. Ha ka kam khaïi tuh dewiong lei, sngewmat la pynïaid thik thik da kita ki High Level. Ha ka kam khyllem ka Dome ka Assembly ruh, ha ka High Level bad ki ong hana wat haduh ka kam thoh tim ha Polo ruh la tuklar lut ka High Level. Imat kam slem shuh ba lada ki paidbah ki pynjop biang ïa kine ki High Level ha kane ka MLA elekshon 2023, kane ka High Level ka lah ban tuklar bad rung syndon kluk wat haduh ing shet ja ne kamrashet ja jong ki paidbah ruh.
Katne ka la ktah ïa ka ïoh ka kot ki paidbah ha kine ki snem ba ladep ruh, katta ruh ka High Level kam salia satia ïa ki paidbah.
Ki driver kali bapli ki la shah khñiot beiñ ha ka kamai kajih jong ki manla ka sngi, tip ki sngewthuh neem ïa kata? Ki nongdie jingdie madan, nongdie jhur, nongdie mar ba laiphew jait ki nang hiar ka die ka thied jongki manla ka sngi, tip ki sngewthuh ne em ïa kata?
Ka thoh ka pule ka hiar arsut bad ïaid dadien pynban ha ka jaka ban ïaid shakhmat. Ka apot ki nongrep bad nongbylla lei yn nai ïakren shuh bad ym don ba salia ne patiaw satia ïa ki. Kat shaba phai ki sohsat bad duhnong suda.
Ban pyllait na kane ka sohsat, ka kheiñ burom ka jah burom jong ka jylla jong ngi, dei sa tang ban pynduh pyndam noh ïa ka High Level jong ka Sorkar MDA.
Lada kwah shisha ban pynduh pyndam ïa ka hynrei ka eh shibun namar kine ki High Level ki pyrkhat tang ïa ka myntoi bad ka ïohnong ma ki. Hynrei, dei tang ka bor u paidbah ha sngi 27 tarik, Rymphang 2023 kaba dei ka sngi sait khuid lut kdar ïa ki jaboh jabaiñ bad ban wanrah biang ka jingkylla ha ka synshar ka khadar bad kumjuh ruh ha ka ïoh ka kot bad ka kamai ka kajih.
Lada ki paidbah kim kyndit bynriew shuh ha ka 27 tarik, Rymphang, 2023 ka sngi pynkup bor ïa u paidbah, yn nai ïa kynnoh bad tei pop shuh hadien habud namar ka jingleh hi da lade ïa lade.
Ka jingkyrduhkam kyrduh jam, ka jinghiar ka kamai ka kajih bad ki apot ba laiphew jait kin nang jur shuh shuh nangne shakhmat lada ngi bakla bad ngim ïa pyrkhat thymmai da kumwei pat.
