Shillong, K’lyngkot, 31: Ki kyrtong kiba pan tiket na ka Bharatiya Janata Party (BJP) khamtam ki Constituency kiba don ar ngut, lai ngut bad haduh saw ngut ki kyrtong kiba ïaknieh ïa ka tiket ki don hapdeng ka jinglynga mynsiem na ka daw ka jingbym pynbna jong ka BJP ïa ka thup kyrteng jong ki kyrtong.
Ka Election Commission of India (ECI) ka la pynbna ïa ka tarik ban pynlong ïa ka elekshon sha ka Iingdorbar ha Meghalaya bad ïa ka Nagaland ha ka 27 tarik, Rymphang, 2023, ka Tripura ha ka 16 tarik, Rymphang, 2023 katba ka sngi ñiew vote kan long ha ka 2 tarik, Lber, 2023.
Dang shen, u State President ka BJP Meghalaya State Unit u Bah Ernest Mawrie u la pyntip ba ki don haduh 123 ngut ki kyrtong kiba la aplai ïa ka tiket na ki Constituency bapher bapher jong ka Jylla.
Ha North Shillong Constituency ki don arngut kiba pan tiket na ka BJP, kata, u Bah M. Kharkrang, u Pulit IPS ba la shongthait bad u Bah Michael Kharsyntiew uba long u dkhot jong ka BJP.
Ha Dalu, ki kyrtong kiba pan tiket ki don haduh 4 ngut bad ha Mahendraganj ki don haduh 6 ngut.
Katto katne ngut ki kyrtong kiba pan tiket na ka BJP ha ka jingïakren bad u nongthoh khubor ki la pynpaw beit ïa ka jingsngew skhem ban ïoh ïa ka tiket namarba ki la trei shitom ban ïoh ïa ka jingshahniah na ki paidbah ha ki Constituency.
Ka tyllong khubor ka ïathuh ba ka jingshim rai jong ka BJP ban ai tiket ïa kino kino ki kyrtong kiba aplai tiket ka long katkum ka jingleh sorjamin da ki tnat syntiat ka Sorkar bad kumjuh da ki nongpeit pyrman kiba ka party ka la thung khnang ban pynsuk ïa ka party ban shim ïa ka rai haba ai ïa ka tiket sha ki kyrtong kiba kham ïoh jingshahniah na ki paidbah bad kiba kham don ka jingïadei kaba jan bad u paidbah.
Ka State Election Committee jong ka BJP Meghalaya State Unit ka ladep phah ïa ka thup kyrteng jong ki kyrtong sha ka Central Parliamentary Committee ba la khlieh da u Myntri Rangbahduh ka ri u Narendra Modi ban ïoh ïa ka jingmynjur bad katkum ka jingïathuh jong u Bah Ernest Mawrie ka BJP kan sa pynbna ïa ka thup kyrteng jong ki kyrtong hapoh ka 2 tarik, Rymphang, 2023.
U Bah Mawrie u la kren da ka jingsngewskhem ba ka BJP kan jop na sor Shillong, na sor Tura bad lehse na Ribhoi.
