Shillong, K’Lyngkot 31 : U National Vice President ka NPP, Bah Prestone Tynsong ha ka sngi Ba-ar u la leit ban pdiang burom hi ïa ki lai ngut ki nongïalam ba hakhmat jong ka HSPDP Mawkynrew kiba la rai ban wan treilang bad ka NPP ha ka jingpynkhreh na ka bynta ka elekshon MLA kaban long shen.
Ïa kitei ki lai ngut ki rangbah ba kynthup ïa u Bah Khring Kshiar, Bah Borlet Kharsati bad Bah Harenjune Kharmulieh, la pdiang burom ha ka jingïalang kaba heh kaba long ha Thynroit ha ryngkat ka jingdonlang u kyrtong ka NPP na Mawkynrew, Bah Kansing Lyngshiang.
Kitei ki heh HSPDP haba kren shwa ban pynïasoh sha ka NPP ki la ïathuh ba ha ka por ba don ka khlam COVID kim shym la ïohi ïano ïano ruh na ki nongmihkhmat ban mih ïarap ïa ki paidbah hynrei ki ïohi tang ïa u Bah Kansing.
“Hynrei ngi ïohi pat mynta kat kaei kaba u Bah Kansing ki bud lut la ka long naduh ba ïarap ïa kiba die jhur haduh ka dawai urea. Kumta ngi kyrmen ba ha ka por ñiew vote ruh kin sa bud nadien jongngi bad ngin jop suk,” ong uwei na kitei ki rangbah. Shuh shuh u ong pat ba katei ka jingbud lang jong kiwei pat ïa kaei kaba u kyrtong ka NPP u leh ka pynmyntoi pynban ïa ki paidbah.
Na ka liang u Bah Prestone pat haba kren hadien ba u la dep pdiang burom ïa kitei ki rangbah u la ong ba ka jingwan khnang jong u sha Thynroit kadei namar um shym lait ban wan donlang bad u kyrtong ha ka sngi ba ki pyllait paidbah ïa ka sboh dawai kaba la ïoh ryngkat ka subsidy ha ka 13tarik mynta u bnai.
Hynrei u ong pat ba tang ha ka 14tarik ki la ïohi pynban ha ki social media ba la shah kynthoh harukom ha kaba la paw lang ruh ka kyrteng jong u kum u Symbud Myntri Rangbah.
U Bah Prestone u la ïathuh ruh ba ha ka por ba ki shim ïa ka rai ban pyllait ïa ka sboh dawai ki la aiti ha ka tnad ka Rep ka Riang hapoh ka jingïalam jong u Bah Banteidor Lyngdoh kum u Myntri Sorkar ba dei ruh u MLA jong ka Mawkynrew, ban leh ïa kaba donkam.
“Hynrei haba pynmih ïa ka Order ki khlem pynmih ïa ka kyntien subsidy. Kumta hadien ba la wan ka kynhun ki nongrep na kylleng hapoh ka jingïalam jong u Bah Kansing, manga bad u Myntri Rangbah ngi la shong ïa ka jingïalang ban shim ïa ka rai ban ai ïa ka dawai sboh ryngkat ka subsidy,” la pynshai u Bah Prestone.
Nalorkata, u ong ruh ba katei ka sienjam ba ki shim kam dei satia kaba ki pynbiej elekshon hynrei ka dei kaba kum ka sorkar ka shim na ka bynta ka jingmyntoi ki paid nongrep.
“Baroh shi katta phi thied 1200 tyngka shi byrni hynrei mynta pat ryngkat ka subsidy haduh shnong ka poi 300 tyngka, kumta 900 tyngka phi la ïoh ban thied khaw, thied doh bad kiwei kiwei kiban pynmyntoi ïa ki nongrep bad u duk su uk,” u la bynrap biang.
U Bah Prestone u lapyntip ruh ba lyngba ka skim FOCUSS, tang na Mawkynrew constituency na ka 3000 ngut kiba la don kyrteng kumba 2000 duna ei ei ki paidbah kiba la dep ïoh ïa ka pisa ha ki account jong ki lyngba ka jingïarap u Bah Kansing.
“Kum u Symbud Myntri Rangbah nga kwah ban pynshai ïa phi ba kane kam dei ka ram namar kadei kaba la ai da ka sorkar kum ka bai seng na ka bynta ki nongshong shnong. Ka jingwohnia jong ki ïa kane ka skim kadei namar ba u nongïalam jong ki um nang ban pynbiang ïa ki kot ki sla ba donkam katba u Bah Kansing pat u leit ban kynduh bad wad jingtip na ki ophisar.”
Na ka liang u kyrtong pat haba kren ha ka jingïalang kaba la poi bun bha ki paidbah na katei ka thaiñ, u la ong ba lada ki paidbah ki la ailad ïa kiwei ki nongmihkhmat ha kine ki snem ba la dep, ka la dei ka pali ba kin ailad lang ïa u kum u MLA ha kane ka samoi ba mynta.
“Long ki nongthep vote kiba jai jai, nai ïa beiñ ïa khoh, ïai shah shipor bad wat pyni ïa ka jingbitar namar ha ka 02tarik u Lber, kiba bein ba khoh ynda la dep ñiew, kin sa wan tied jingkhang ha Secretariat bad ha ophis jongnga ha Thangsning,” u la ong.
Nalorkata, u ong ruh ba kane kadei ka sien kaba nyngkong kaba u ïakhun ïa ka elekshon MLA hynrei um pat ju mad pat ïa ka jingshah kren beiñ.
“Ngam lah shuh ban klet ïa ka jingjia ba mih nangne na shnong jong phi. Kum u nongïalam nga kloi ban shah phrang namar nga kwah ban ïohi ba ha ka 02tarik ngin jop donburom,” u la ong.
