La pyndep ïa ka lehniam shi hat shi taïew ka kiew pyneh rngiew ha u Lum Sohpet Bneng

0

Shillong, K’lyngkot, 31: Ka Lum Sohpetbneng Komiti , ka Kynhun U Tymmen U San jong ka Seng Khasi Kmie, Mawkhar Shillong, hynnin ka sngi ka 29 tarik u Kyllalyngkot 2023, ka la pyndep ïa ka leh niam jong ka Shi Hat Shi taïew shwa jong ka Kiew Pyneh Rngiew 2023 kaban long ha ka 5 tarik u Rymphang 2023 ha u Lum Sohpetbneng.
Ka lehniam ka shi hat shi taïew, la sdang nyngkong eh na khyrdop Lum Sohpetbneng umïam da ka pynsngew ka pynsngap ka nguh ka dem ha ki ‘Lei Dwar’ Lei lynti ha ryngkat ka pynsum pynsleh da ka um khuid um suba. Nangta, ynda lah poi ha Lum Dorbar Law Nongthroh, hangne u Tymmen U San hapoh ka jingïalam u Rgh Skor Jala, u la shim ïa ka kamram ban leit sha ka shat ka khein ka khnong ka bishar da kaba pynsngew pynsngap sha ki Blei da kaba ïa pan lyngba ki dak ki shin jong ki sakhi hok sakhi Blei jong u khaw eh u khaw shan ka lengbah ka lengsan, ban da pyntip sha ki lei ryngkew ki lei basa ban pdiang hok bad suk mynsiem ïa ka kiew pyneh rngiew kaba shi sien shi snem sha u Lum sohpetbeng.
Haba ka jingïapan lyngba ka lengbah ka lengsan ka la biang bad shai kdar, ka la dei pat ka pali ban kiew pat sa sha u lum jong ka Mei Mawbuh, hangne la pyndep ïa ka nguh Blei ka Dem Blei da kawei ka ïar kynthei bad uwei u ïar shynrang ïa kaba la pyndep ïa ka kam da u Rgh Skor Jala bad u Rgh D. Syiem.
Haba la dep ka nguh ka dem, ka peit dak peit shin bad ka bishar lyngba u Rwieng u Rwiang ki dkhot ki dkhai bad va ka kam ka lah bha, la pynlong ka jinghiar sha kjat jong ka Mei Mawbuh, ha kaba la pynsum pynsleh da ka um ksiar ka um rupa da u Tymmen U San lem bad ki paidbah.
Ka bynta kaba lai ka nguh ka dem ka shi hat shi taïew ka dei pat ha khmat jong u Mawshong Blei u nongap nongpahara ïa ki ki sawdong ki sawkun ka kliar Lum Sohpetbeng bad ïa ka Duwan Dupat ïa kaba hangne ruh la ïaid da ka shat ka khein ka khnong ka bishar da ka lengbah ka lengsan, ban pynsngew ban pynsngap ïa ka khana ka parom jong ka jingïoh jingbit na ki dak ki shin jong ka nguh ka dem na Lum Dorbar bad na ka Mei Mawbuh. Hangne ruh mar sien ïa shat ka pylleng, da kup ki dak ki shin katkum ka jingkyrpad na ka bynta ka jingKiew Pyneh Rngiew kaba shi sien shi snem ka ban long ha ka 05 tarik u Kyllalyngkot 2023.
Haba kut la kiew pat sa ha Ka duwan ka dupat ban pynkhuid pynsuba da ka um ksiar um rupa ba la ïadon bynta lang lem bad u Basan Rangslang jong ka ka Raid Mawbuh, ka nguh ka dem ba la pyndep da u Rgh Donbokstar Kurkalang bad kyntiew ïa ka lama jong ka seng Khasi da u Rgh O. Pyngrope Vice President Seng Khasi Kmie.

Leave A Reply

Your email address will not be published.