Shillong, K’Lyngkot 31: Ka nongaiktien jong ka National People’s Party (NPP), ka Dr. M. Ampareen Lyngdoh ka la ong ba ka jingïatan tyllai ka dang ïai don bad ka la pynpaw ïa ka jingkyrmen ba ka jingïatan tyllai shwa ka election kan sa sangeh noh tad haduh hadien ka election.
Kane ka jingkren jong ka Kong Ampareen ka long haba kylli halor ka jingkylli ïa ka jingpra jong ka NPP ha Ranikor, ha kaba ki nongkyrshan u kyrtong ba la pynbna da ka NPP, u Martin M Danggo ki la rai ban leit ïasoh noh sha ka BJP, da kaba dawa ruh ba u Bah danggo udei ban ïakhun noh ïa ka election na ka BJP ym shuh na ka NPP. Ka Kong Ampareen ka la ong ba ha kane ka election ym dei tang u kyrtong ka NPP uba la mih hadien ba la pynbna paidbah, hynrei u kyrtong ka Trinamool Congress (TMC) na Pynthorumkhrah ruh u la leh kumjuh.“Nga kyrmen ba kane ka jingïatan tyllai shwa ka election kan sa sangeh noh tad haduh hadien ka election, namar ki party nongwei te ha ka khyllipmat ba khatduh ruh kin khwai beit,” bad bynrap ba hadien ka election kam tharai shuh ban dang don ka jingsynjor namar ka la skhem lut.
