Sha Guwahati leit pynbeit u Dangngo bad ki heh BJP, kadei ka kam ba la plan lypa : Bah Prestone

Shillong, K’Lyngkot 31 : U National Vice President ka NPP, Bah Prestone Tynsong ha ka sngi Ba-ar u la ong ba ka jingmih noh ki nongïalam ka NPP Ranikor kaban sa bud lang ruh da u Bah MM Dangngo kadei kaba la pynbeit lypa la kumba katto katne.
“La kumba shi bnai ei ei ngi la ïoh jingtip ba u leit ban kynduh ïa ki nongïalam BJP ha nongbah Guwahati. Hynrei, ngam nud ban ong ei ei halor kata namar haba u briew u mon ban leh kumta ngim lah ban leh eiei shuh” ong u Bah Prestone haba kren bad ki lad pathai khubor.
U ong ruh ba na ka liang ka party kim kwah shuh ban ong ei ei namar ïoh lehse u Bah Dangngo u sngew kumba lada u leit sha ka BJP un jop ha kane ka elekshon MLA.
U Bah Prestone u ong ruh ba mynta ki shaniah ha ka jingstad jong ki paidbah ka Ranikor ban bishar bad ai ka jubab. “Kane ka la paw khyllung khynnah lut namar u mih na ka NPP u leit sha ka Congress u wan phai biang sha ka NPP bad mynta pat u mih biang ban leit sha ka BJP.”
Shuh shuh u ong ruh ba ïa ka jingkheiñ jingdiah hi yn sa paw pyrthei lut ha ka 02tarik u Rymphang mynta u snem kaba dei ka sngi ñiew vote.Shwa kane, u Bah Prestone u la ong ruh ba dalade hi u la pyrshang ban kren ïa u Bah Dangngo tangba um shym la ïohlad satia namar ka mobile jong u kaba shu pynlip beit.
Haba pynshai pat halor ka jingkynnoh ba ki heh ka NPP kim ju ailad ban kynduh ïa ki nongïalam ka NPP Ranikor ban kynduh ïa u Myntri Rangbah ba dei ruh u National President, na ka liang u Bah Prestone u la ong ba katei kadei ka jingkren ba khlem nongrim namar na ka liang jong u ryngkat u Myntri Rangbah ki ladep ban shong bad u Bah Dangngo ryngkat u ki heh NPP na Ranikor ban kren halor kiba bun ki phang kiba ïadei bad ki mat jingdawa jong ki.
Kumban shu kdew hangne, da ki spah ngut ki nongïalam ka NPP na Ranikor ki la resaiñ paidbah ha ka sngi Nyngkong bad leit ruh ban pynïasoh sha ka BJP. Ha kane kajuh ka sngi ki nongïalam ki la pynbor ruh ïa u Bah MM Dangngo ba u ruh un resaiñ lang noh bad pynïasoh lang sha ka BJP ban pynkhreh na ka bynta ka elekshon MLA kaban sa long shen.
Ki nongïalam hapoh ka jingïalam jong ka kong Pelcy Snaitang ki la kynnoh ruh ba ka jingmih jong ki kadei hadien ba ki ïohi ïa ka message kaba la phriang kylleng kaba kynnoh ba ki heh NPP ki kwah ban pynrem ïa u Bah Dangngo ha kane ka elekshon.