Da ki thuk thuk pan jingkyrshan ka VPP ha Shillong ka NPP ha Ampati

Shillong, K’lyngkot 31: Ka VPP Youth Wing mynta ka sngi ka la pynlong da ka Bike Rally ha nongbah Shillong kum ka dak ban pan jingkyrshan na ki paidbah ha kane ka elekshon MLA ka ban long ha ka 27 tarik u Rymphang 2023.
Ïa kane ka jingñiah thuk thuk ba la lamkhmat da u Bah Ardent MIller Basaïawmoit, Presudent jong ka VPP Central Body, la sdang na Mawïongrim ter ter sha Mawlai Nongkwar, Nonglum, Phudmuri, Mawroh, nangta sha Golflink, Polo, Lawmali, Jaïaw, Mawkhar, Wahingdoh, Laban, Malki, Laitumkhrah, Nongthymmai, Madanryting, Mawblei, Laitkor, Lad Nongkrem ter ter shaduh Smit bad la pynkut ha Nongkrem.
Da ki spah ngut ki Samla shynrang bad kynthei ki la ïashim bynta lang ha kane ka rally. La pynshngaiñ ïa kane ka jingïaid rally da ki ar shaka da ka jingïadon lang u Bah Adelbert Nongrum, kyrtong ka Seng na North Shillong, u Dr. Ricky Syngkon, Kyrtong na Umsning, Bah Brighstarwell Marbañiang, kyrtong na Mawlai, Samla Mayborn Lyngdoh, kyrtong na Pynthorumkhrah, Bah Tony Lyngdoh, kyrtong na Nongthymmai, Bah Raja Thabah, kyrtong na Shillong West.
Haba ai ka jingkren kaba lyngkot hadien ba la pynkut ïa kane ka rally ha Nongkrem, u Vice President jong ka VPP Youth Wing, u la ong ba ka VPP ka lah ban dei kaba duk ha ka spah pyrthei,hynrei kam duk pat ha ka spah mynsiem. Dei namar kane ka daw ba ki Samla ki la mih da ki spah ngut mynta ka sngi haba pynlong ïa kane ka rally wat haba la wer tang lyngba ki lad pathai khubor ruh.
Haba pynpaw ka jingsngewnguh ïa ki Samla bad ki nongïalam kiba la wan ïashim bynta ha kane ka bike rally, une u samla nongïalam, ula ong ba kane ka mynsiem ka jingieit ïa ka Party kadei ban pur sha ka jingieit ïa ka ri bad ka jaidbynriew bad ïa kane lah ban leh ruh ryngkat ka jingkitkhlieh lyngba kane ka elekshon da kaba kyrshan ïa ki kyrtong jong ka VPP.
Ampati: U National President ka National People’s Party (NPP) u Conrad K. Sangma mynta ka sngi ki la ïalam ïa ki spah ngut ki nongthep vote na ki lai tylli ki Constituency ka South Garo Hills District ban leit tur da ki thuk thuk sha ka ktem ba khlaiñ eh jong u Dr. Mukul Sangma, kata ka Ampati.
Kane ka jingleit tur da ki arshana ka long lyngba ka Bike Rally kaba la sdan na Ampati sha Garodubhi kaba ka jingjngai ka long 20 Kilometar.
Haba kren ha ka jingialang ïalap elekshon ha Ampati, u Conrad u la kular ba ka NPP kan sa plie lad ban aikam haduh 5 lak tylli lyngba ki lad seng kam bapher bapher bad ki thong kiba ka sorkar ka la buh.
U la ong ba ka Sorkar ba ialam da ka NPP ha ki san snem baladep, ka la pynsdang bun tylli ki kam kiba la ai jingmyntoi ïa ki samla kiba kynthup ia ka PRIME, kaba la ai jingkyrshan pisa bad pynioh jinghikai pyntbit na ka bynta ki nongseng kam lajong.
“Ka party jong ngi ka ju phaikhmat na ka bynta ban kyntiew ïa ka bha ka miat jong ki samla, lyngba ki prokram kum ka PRIME, ngi la kyntiew ïa ki nongsengkam ha Meghalaya,” u la ong.  U la ong ba ka NPP ka la trei shitom na ka bynta ki samla da kaba wanrah ia ki prokram kum ka ASPIRE Meghalaya bad ka YESS Meghalaya.
Shuh shuh u la ong ba ki samla ha ka Jylla ki ïoh ïa ka lad ban pynpaw pyrthei ha ka sports, ka rwai ka siaw ka tem ka put bad kiwei kiwei de ki kam bad ka NPP kan dang ïai bteng ban kyntiew shuh shuh ia ki prokram jong ki samla da kaba pynlong ïa ki rynsan ialehkai ha ki shnong, ki district bad ha ka jylla khnang ban plie lad ia ki.
“Ha ki san snem ki ban sa wan, lada u paidbah u pynkup bor ïa ngi, ngin sa nang iai bteng ïa ki prokram jong ngi ban phaikhmat sha ki samla,” u la kular.
Da kaba pynkynmaw ha ka jingialang kaba la long ha u snem 2018, ka NPP kam shym la jop wat tang shi seat na South West Garo Hills, u la ong, ka long kaba eh ïa ka Sorkar ban pynsdang ïa ki kam pynroi namarba ki MLA ki dei na ka Liang Pyrshah naba kim ju ai ka jingiatreilang bad ka Sorkar.
U la ong ba ka NPP ka la buh thong ban ioh ia ka jingjop kaba bun paid ha kane ka kynti bad kumba paw ka paw ha South West Garo Hills kan don ka jingiatylli ban pynthikna ïa ka jingjop jong ka NPP.  ”Ka long kaba donkam eh ïa ki MLA ban ïatreilang bad ka Sorkar.  Kan jin da la bha shaba palat ban don ïa ki MLA kiba don ha ka Liang Synshar,” ong une u nongïalam ka NPP.
Haba kynnoh ïa ka TMC mynta ka la kad arliang, u la ong ba bun na ki nongkyrshan ka TMC ki la mih noh bad pynïasoh bad ka NPP namarba ki tip shai ba ka TMC kam don lawei satia.
Ha ka jingïalang ba la sakhi lang ha ki hajar ngut ki paidbah, da ki spah ngut ki nongkyrshan ka TMC ki la pynïasoh bad ka NPP ban ai jingkyrshan ïa u Stevie Marak, u Subir Marak, u Sanjay A. Sangma bad ïa u Ian Botham K Sangma.