Election MLA 2023 : Thep kyrteng ka Dr. Jasmine, ka Dr. Ampareen bad u Bah Pynshai Syiem

Shillong, K’lyngkot 31: Ka MLA jong ka East Shillong Constituency ka Dr. M. Ampareen Lyngdoh bad ka para ka Dr. Jasmine Mary Lyngdoh ha ka sngi baar ki la thep kyrteng hakhmat ki Returning Officer, ha Ophis treikam jong u Deputy Commissioner jong ka East Khasi Hills District na ka bynta ban aireng ha ka elekshon sha ka Iingdorbar Thawaiñ ka ban sa long ha ka 27 tarik, Rymphang, 2023.
Ka Dr. Ampareen bad ka Dr. Jasmine ki la thep kyrteng kum ki kyrtong jong ka National People’s Party (NPP) ban ïakhun na East Shillong Constituency bad na Nongthymmai Constituency.
Ha ka jingïakren bad ki lad pathai khubor ka Dr. Ampareen ka la ong, “ka dei ka rukom leh ha ka iing jong ngi naduh u snem 1972 i Pa (Peter G. Marbaniang) i dei iba nyngkong eh ban thep kyrteng beit bad hadien kata i Bahbah (Bah Robert G. Lyngdoh) i dei beit iba nyngkong bad ynda la nga la shimti ma nga ïa kine ki kam ruh nga ju thep kyrteng beit ha kane ka sngi nyngkong. Ka ju dei ka jingsarong jong ka ïing ka sem.”
Haba kylli, ka la ong, “shuwa ban rai ban leit sha kawei ka party ruh nga la rai bad ïa syllok bad ki paidbah lajong. Ka jingleit sha kawei ka party ruh kam shym la ktah satia ïa ka jingmih jong nga ban ïakhun. Ngim ju dei ban sarong kum ki nongtyrwa ban long ki nongïaleh elekshon ha ka Constituency hynrei nga tip ba ka sur u paidbah, ka jingieid u paidbah, ka jingai ka kti ka mon jong u paidbah nga i ha kine ki taïew hadien ba nga la rai ban leit sha ka NPP ka la nang kham skhem shuh shuh.”
Halor ka mukotduma, ka Dr. Ampareen ka la ong, “ki paidbah jong ngi la ïashai halor ka mukotduma ha District and Session Court ïa kaba la nga la pyntip ïa ka jingbymdon kti jong nga ha kata ka kam. Baroh shi katto la shu ïakren ha lynti ha syngkien. Ka Election Commission ka ailad ïa ngi kiba la shah kynnoh ba ngin leit sha ka mukotduma ba ngin pynbna ruh sha ki paidbah ba peit ki jingbakla ki jingduna ki lah ban don hynrei ngi dei ki kyrtong jong ki. Kato ka kam ka long sa tang ban leit pynkhuid hakhmat ka ïingbishar.”
Ka Dr. Jasmine Lyngdoh ka la ong, “ngi te ngi ai ka shispah na ka shi spah bad kata ka shong ha ki briew ban ai shispah na ka shispah ba kin kyrshan ïa ngi namar ki ïohi kumno ngi ïatrei, ki tip ki prokram aiu ba ngin wanrah sha Nongthymmai bad sha ka Jylla. Nga kyrmen ba kin don beit bad nga,” .
Haba kylli, ka la ong, “ka thong kaba nyngkong eh ka long ban peit ïa ka jingdonkam jong ki nongshong shnong ha ka Constituency bad ym dei tang shisien ha ka elekshon hynrei borabor ba ngin leit kynjoh ktien ïa ki, ngin leit sngap ïa ki jingkam jong ki bad ngin ai beit ka jingshakri kaba long na ka mynsiem khnang ba kin ïoh ïa ki jingdonkam. Lada ki nongïalam kim poi sha ki briew, kin ym tip hi ruh ba ki don kum kine ki prokram, dei ban kyntiew keiñ ïa ki.”
“Ha Nongthymmai ba ka um ka kham jynjar ngin ïaleh katba lah ban ïakren ïa kine ki jingkyrduh um jong ki. Ka jingïoh jong ki (paidbah) ka shu syrwa tang haba thied um. Haba ngi peit, ki bun ki iing kiba donkam shisha ïa ki Housing Scheme. Ki khynnah samla leilei, ka jingstad jong ki tangba ym don ba pyni ki lad ki lynti kumno ban pynmyntoi ïa ka jingstad. Nga ïohi ba ka spah jong ka Meghalaya hi ka dei ha ki khynnah samla,” la bynrap ka Dr. Jasmine.
“Ka dei ha ki briew ban sngewthuh ba ka pisa ka dei tang shi sngi bad ka jingtrei shitom bad ki prokram kin long shi rta jingim. Nga buh ïa kata ha ki briew ba kim dei ban shah pynbiej namarba ynda ki la shim ïa ki jingai lehse ka jingduk jong ki ka pynlong ïa ki lada ki leit sha ki MLA ym don ba sngap shuh keiñ ïa ki. Ki dei ban stad ka rukom thep vote mynta ka kynti.
U MLA barim jong ka Mylliem Constituency u Bah Pynshai Manik Syiem ha kane ka sngi u la thep kyrteng kum u kyrtong shimet ban aireng pyrshah ïa u MLA u Bah Hamletson Dohling bad ïa u MDC u Bah Ronnie V. Lyngdoh na Mylliem Constituency.