3 baje janmiet la lut u Sohtrun ha Delhi ha ka sngi pynkut ïa ka Pineapple Festival

New Delhi, Naitung 12: Ka jingïaknieh ban thied ïa u sohtrun na Meghalaya ha Nongbah Delhi ka la long kaba shyrkhei haduh katta katta, haduh ba u sohtrun uba la rah kumba 25 metric ton na Meghalaya u la lut noh ha ka por kumba 3 baje janmiet ha ka sngi ba pynkut ïa ka Pineapple Festival kaba la neh lai sngi ha Dilli Haat.
Ha ka sngi khatduh jong ka tamasa, ki paidbah na kylleng ki bynta jong ka Nongbah Delhi bad kiwei pat ki jaka ki la tuid sha katei ka tamasa ban thied ïa u sohtrun na Meghalaya. Hynrei, bun na ki, ki la hap ban leit phai thylli noh namar ba u soh u la dep lut noh hashwa ban kut ka por die.Wat hadien ba u soh u la lut, dang bun ki nongwan kiba dang wad bad kylli la don ne em shuh u sohtrun ban thied.
Ki paidbah kiba la ioh ban mad ïa u sohtrun ki la ai jingïaroh shibun ïa ka jingthiang, ka jingbang bad ka jingitynnad jong u, da kaba ong ba u sohtrun na Meghalaya u long uba kyrpang bad uba pher na kiwei pat ki jait sohtrun kiba ju ïoh ha ki ïew. Ka jingbun jong kiba wan thied ka la pyni shai ba ka jingdawa ïa une u soh ka long kaba kham bun ha kaba kila kyrmen ba haki snem ban wan ka sorkar Meghalaya kan dang wanrah shuh shuh kham bun.
Ki nongdie ruh ki la pynpaw ba watla ki la khmih lynti ba u soh un dang neh haduh ka por miet, hynrei namar ka jingbun palat ki nongwan thied, u soh u la dep lut noh hashwa ka por bad kane ka dei ka jingjop jong kane ka tamasa sohtrun.
Ïa ka Pineapple Festival la pynkut noh mynta ka 12 tarik Naitung, kaba dei ka sngi U Blei, hapdeng ka jingiphuh jingphieng bad ka jingshim bynta shitrhem jong ki nongtem bad ki nongrwai na Meghalaya kiba la pynshongshit ïa ki paidbah da ki jingrwai bad ki jingput jingtem.