2nd DIVISION: Jop ka Mawtawar SC, ïakhaid kawei ka jingïakhun
Khyrwit hat trick u Elnathan Wahlang.
Shillong, Naiwieng 15: Ka resol jong ar tylli ki jingïalehkai ka ba la pynlong ha MFA Ground jong ka kyrdan 2nd DIVISION ka la jam sha kaba kut ha kaba ka Mawtawar SC ka la khur ïa ka namjop katba kawei ka jingïakhun ka la ïakhaid.
Ka jingïakhun kaba nyngkong kaba la sdang ha ka por 11:30 baje mynstep hapdeng ka Smit SC pyrshah ïa ka Nongrah SC bad ka jingïakhun ka la jam sha kaba kut da ka jingïakhaid da mar 1-1 kol.
Dei ka Nongrah SC kaba la ïoh ban lamkhmat nyngkong ïa ka jingïalehkai lyngba ka kol na u Dawandappura Pathaw ha ka minit ba 8 hynrei ka Smit SC ka la ïoh ban pynïakhaid lyngba u Bansynran Mylliemngap ha ka 30 minit.
Haba phai pat sha ka jingïakhun kaba ar kaba la sdang ha ka por 2 baje nohphaisngi, ka Mawtawar SC ka la khur ïa ka namjop hadien ba pynliem ïa ka Marbisu SC da 3 – 1 kol.
Katba ka namtam ka long sha u Elnathan Wahlang jong ka Marbisu SC u ba la khyrwit ïa baroh lai kol ha ka 7, 64 & 75 minit.
Ka jingïalehkai mynta ka sngi yn pynlong ha 1st Ground SSA Stadium naduh ka por 11:30 baje hapdeng ka Sohryngkham SC pyrshah ïa ka Laitlyngkot SC, bud sa ka jingïakhun hapdeng ka Jongksha pyrshah ïa ka Nongkrem SC.