Naiwieng 15: Ka kynhun lehkai jong ka Rangdajied United FC bad ka Kickstart FC ki la ïoh ban khur mar shi point hadien ba ki la ïakhaid da mar 2-2 kol na ka jingïakhun napoh ka Group C ha ka lympung lehkai 3rd Division I-League hynne ka step Sngi Balang ha Goa.
Haba phai sha kane ka jingïakhun baroh ar kynhun ki la ïohlad ban lamkhmat katto katne por ïa ka jingïakhun, ha kaba ka Kickstart FC ka la ïoh ban lamkhmat nyngkong lyngba ka kol na u Khanngam Hora tang hadien 3 minit ba la ïaid ka por hynrei ka Rangdajied United ka la jubab lyngba u Arlangky Nongsiej (43’P).
Katba ha ka jingïakhun jong ka kylla miet, dei sa ka Ragdajied kaba la ïoh ban lamkhmat ïa ka jingïalehkai lyngba ka kol na u Ieitlang Syiemlieh (57′) hynrei tang hadien katto katne por u Khanngam Hora u la ïoh ban thep biang ïa ka kol kaba ar ha ka 68′ na bynta ka Kickstart kaba la pynïakhaid ïa ka jingïakhun.
Lyngba kane ka jingïakhaid, ka Rangdajied ka la ïoh ban kyntiew 4 point hadien ba jop shi sien ha ka jingïakhun ba ladep, bad kan sa wanphai biang ha rynsan ïakhun ha ka 19 tarik ka ban long pyrshah ïa ka Jeppiaar Institute of Technology FC ha ka por 9 baje mynstep.
