Shillong, Naiwieng 15: Ka PFR FA ryngkat bad ka Mylliem Lum SC ki la ïohrung sha ka final jong ka SSA 3rd DIVISION Football League 2023 hadien ba ki la khur namjop ha ka jingïalehkai semi final kaba la long hynne ka Sngi Balang ha madan 1st Ground SSA Stadium, Polo.
Haba phai sha ka jingïakhun semi final kaba nyngkong kaba la sdang ha ka por 11:30 baje mynstep, hapdeng ka MLP FT pyrshah ïa ka PFR FA, ka jingïakhun ka la jam sha kaba kut ha kaba ka PFR FA ka la khur ïa ka namjop salit da 0-1 kol.
Haba phai sha ka jingïalehkai, ka kylla step ka la kut ym shym la don ba lah ban pynkhihjar, dei tad ynda katto katne por ba la ïaid ka jingïalehkai ha ka kylla kaba ar ba u Thymmaibor Mukhim u la buh shakhmat ïa ka kynhun (PFR FA) lyngba ka kol ha ka 63 minit.
Kane ka kol ka la ïeng skhem haduh kaba kut jong ka por kaba la wanrah namjop sha ka kynhun bad ruh ban ïohrung sha ka final jong kane ka lympung.
Haba phai pat sha ka jingïakhun semi final kaba ar kaba la sdang ha ka por 2 baje nohphaisngi hapdeng ka Mylliem Lum SC pyrshah ïa ka Nongkseh SC, ka la kut ha kaba ka Mylliem Lum SC ka la jop da 2-1 kol.
Ka namtam ka long sha u Eliastar Nongsiej u ba la thep baroh ar kol na bynta ka Mylliem Lum SC. Ka Mylliem Lum SC ka la ïoh ban lamkhmat nyngkong ha ka minit ba 6 na ka kol u Eliastar Nongsiej hynrei ka Nongkseh SC ka la ïoh pat ban pynïakhaid lyngba u Jowel Khongdup ha ka 9 minit.
Hadien kane, ka jingïakhun ka la long kaba ïakhaid bad shi slem ym shym la don ba lah ban thep dei tad ynda la jam sha ka 88 minit ba u Eliastar Nongsiej u la thep ïa ka kol ban pynjop ïa ka kynhun.
Kine ki ar kynhun kiba la ïohrung sha ka final, kata ka PFR FA bad ka Mylliem Lum SC kin sa ïaknieh namlahduh ha ka kyrdan 3rd Division ha ka 20 tarik Naiwieng, 2023.
