Shillong, Naitung 16: Ka khubor ba sngewtynnad ïa ki paid riew ieit bad shit rhem ïa ka phutbol jong ka jylla khamtam ïa ka nongbah Shillong, namar ba ha ki shiphew sngi ban sa wan ka lympung ïalehkai bna nam tam ha ka jylla, katta ka Shillong Premier League 2026 (SPL) kan sa khreh ba kan sdang noh bad ka jingïalehkai ba nyngkong kan long hapdeng ka klob kaba bat ïa ka nam lahduh kata ka Langsning FC ka ban aireng pyrshah ïa ka Sawmer SCC.
Kane ka jingïalehkai sdang jong kane ka lympung la buh ba kan sdang naduh ka 25 tarik mynta u bnai.
Haba ïadei bad kane, ka Tournament Committee ka SSA mynta hi ka sngi ka la wan shakhmat ba kan pyllait paidbah ïa ka prokram ba pura jong kane ka lympung, ha kaba ïa mynta la pyllait shuwa ïa ki tarik bad ka por ïalehkai tang na ka bynta ki 7 tylli ki jingïakhun sdang bad ïa ki jingïalehkai kiba dang sah yn pynbna pat kham hadien.
Kiwei pat ki 8 tylli ki klob ban shim bynta mynta ka samoi ki long ka Shillong Lajong FC, Mawlai SC, Nangkiew Irat SC, Rangdajied United FC, Laitkor SC, Mylliem SC, Nongkseh SSCC bad Meghalaya Police (ki ar tylli ba hadien kidei kiba la kiew kyrdan na ka First Division).
Kumba la long ha ka samoi ba la dep, ka SSA kan dang ïai bteng ba kan pynlong ïa ka SPL tang shi kylla ne single leg, ha kaba ka kynhun ba kamai bun ka point na baroh ki 45 tylli ki jingïalehkai kan khreh ba kan rah ïa ka nam kum ka lahduh, katba ki artylli ki kynhun ba khur duna pat ka point kin shah pynhiar kyrdan sha ka First Division.
Nalor katta, ka SSA kan dang bteng ruh ban pynlong ïa ka Super Cup, ban kynthup tang ïa ki 6 tylli ki kynhun ba kamai bun point na ka SPL. Ki kynhun ba wan ba nyngkong bad ba-ar na ka SPL kin rung beit beit sha ka semifinal, katba ki kynhun ba wan kyrdan ba lai haduh ba hynriew kin khreh ba kin ïakhun shuwa ïa ki playoffs kum shi bynta ba kin lah pat ban rung sha ka semifinal.
Shuh shuh, mynta ka samoi yn pynïaid ïa ka lympung ryngkat bad ki kyndon ïalehkai kiba thymmai, kaba kynthup ïa ka kyndon jong ka 10 sekon ban pynmih bujli ïa ki player, hapoh san sekon ban sdang biang ïa ka jingïakhun bad kiwei kiwei ki kyndon. Kumjuh ruh ki rangïalehkai kin hap ban phikir bha namar ki lah ban shah sei da ka red card lada jia ba u tap ne da ïa la ka jong ka shyntur ha ka por ba u ïakren bad u player uba ïakhun pyrshah, ban pyndonkam ïa ki kyntien pynshit, pyndom ne kino kino ki jait kyntien.
Shuh shuh ban nang kham pynjanai bad pynjlih ïa ka lympung hi baroh kawei, man la ki team ne klob ba ïakhun kin hap ban pynrung ïa ka kyrteng ki player (register) ha ka thup lum kyrteng ne ka Centralised Registration System (CRS) ka All India Football Federation (AIFF).
Hagba ïadei pat bad ki coach, ki klob ki donkam ban don ïa ki coach kiba don ïa ka AFC A ne B Licence ne kino kino ki licence kiba ïa ryngkat bad kine ne ki lah ruh ban dei kiba don ïa ka Diploma ha ka kam ban ai jinghikai ïa ka Sports (Coaching) na ki skul bah pule National Institute of Sports (NIS).
