25 snem hapdeng ki rai-eh rai-dam ïaid lynti ka skul Lebiwell Memorial SS ha Umling

Nongpoh, Nailur 02: Hapdeng bun ki jingeh jingtynjuh bad ki rai-eh rai-dam haka jingïaid lynti, ka skul Lebiwell Memorial Secondary School kaba don haka shnong Umling Ri-Bhoi District mynta u snem kala kynjoh sha u mawmer ba 25 snem ka jingïaid lynti naduh bala seng ïaka ha u snem 2001 ban long ka sharak bad ka shlem ban phrang jingnang jingstad ha katei ka thaiñ.
Ïa kane ka skul la seng ha ka 5 tarik u Rymphang 2001 ban ai burom ïa i Bah Lebiwell Lyngdoh (Bam kwai ha dwar u Blei) kum u kpa ka ing bad uba dei ruh u rangbah uba don ka jingieit ba kyrpang ban kyntiew ïa ka pule ka puthi ha ka por kaba u dang im ha kane ka shnong bad dei da ka jingieng rangbah ki lai ngut ba kynthup ïaka Kong Miriam Mawrie, ka kong Sianti Mawrie bad u Bah Augustine Wahlang ryngkat ka jingkyrshan ka Kong Isida Mawrie kaba dei ka kurim i Late Lebiwell Lyngdoh uba la don ka jingangnud ban seng ïa kane ka skul, katei ka skul ka ieng skhem kumba ka long mynta.
Ha kane ka sngi ka jingrakhe ïa u mawmer ba 25 snem ka jingïaid lynti la ioh ruh ban plie syndon ïaka iing building kaba paka hadien ba baroh shi katta la shu shong haka iing skul kaba la jot rathai, bad ïa kane ka jingrakhe ïaka jingdap 25 snem ne ka jubili rupa la wan ban plie paidbah da u Bah Lakmen Rymbui myntri ka tnad pule puthi ka jylla kum u kongsan haka jingdonlang u Bah Mayral Born Syiem MLA ka Nongpoh kum u symbud kongsan.
La sakhi ruh ha kane ka sngi da ka jingdonlang ka kong Rona Khymdeit MDC ka Nongpoh, u Bah Mathew K Makdoh nominated MDC, Bah R Shadap District School Education Officer ka Ri-Bhoi, ki nonghikai, ki kmie ki kpa, ki samla pule barim bad kiwei kiwei ki riew rangbah.
La pynphuh pynphieng ruh ha kane ka sngi da ki jingshad bad jingrwai bala shim bynta shitrhem da ki khynnah skul, ki nonghikai bad ki kmie ki kpa jong ki khynnah ban lehkmen ha kane ka sngi hadien ba katei ka skul kala nang roi bad kiew sted katba nangmih ki sngi.
Haba kren ha kane ka sngi naka liang u Bah Lakmen Rymbui u la la ong, ban seng ïaka skul kam long kaba suk hynrei u la ai khublei ïaki nongseng, kiba la don bynta ban pynphalang ïa katei ka skul kumba ka long mynta ban phrang bad pynwandur ïaka jingnang jingstad bad ka akor ka burom haki khynnah kiba leit ban pule bad wad jingnang jingstad.
U la ong ruh ba ka jingpule mynta kam long shuh kum mynshuwa namar ka dei ka juk jong ka jingïaleh bad ki syrnod bala dep pule ki dei tang ki lynti ban ithuh ïa kaei kaba la dep, hynrei kaei kaba kongsan ka long ban ioh ïaki kam ki jam, la kadei ka kam sorkar, kam shimet ne ka kam lajong nakata ka daw ka don ka jingïaleh namar 60 hajar ngut ki samla haka shisnem ki wad lad ban ioh ïaki kam ki jam kiba biang bad kam long kaba suk ban ioh namar kawei ka post haka kam sorkar hap ban ïakhun da ki hajar.
U la ong ruh ba ka sorkar kala plielad ïa kiba bun ki khun samla ha kane ka juk ba mynta namar kam long kaba suk ban shu ïabeh tang ka kam sorkar da kaba pynmih ïaki skhim, ki jinghikai bad ki lad iohkam bad sengkam khnang ba ki samla kin lah ban ieng hala ki jong ki kjat bad lyngba kane ka jingangnud ka long kaba seisoh namar bun ki samla kila lah ban pyrshang bad ban iengskhem hala ki jong ki kjat da kaba seng ki kam lajong.
Namarkata u la kyntu ruh ïaki khynnah pule ba ki dei ban shimkhia haka jingpule ban minot thop ryngkat ka akor ka burom kaba kham kongsan khnang ba kin longbriew manbriew haka jingim jong ki kumba ki angnud.