Ai jingïaroh u MR ïa ka jingnoh synñiang ki nonghikai ha ka jingrakhe Teacher’s Day ha Tura

Shillong, Nailur 02 : U Myntri Rangbah ka Jylla, u Conrad K. Sangma, ha ka sngi Balang u la shim bynta ha ka jingrakhe ïa ka sngi burom ki nonghikai ha ka jylla ha Tura, ryngkat bad ki nonghikai na kylleng ka rilum Garo Hills bad na ka jylla hi baroh kawei.
Ha kane ka prokram la pynkup burom ruh ïa ki nonghikai da ka State Teachers’ Awards bad District Teachers’ Awards 2026, ki Best Scout Master & Guide Captain Awards bad ka jingai jingïarap pisa hapoh ka Teachers’ Welfare Fund.
Da kaba ai khublei ïa baroh ki nongïoh khusnam, u Myntri Rangbah u la ong ba ka jingithuh bad ka jingpynkup burom kam dei tang na ka bynta kito kiba ïoh khusnam mynta ka sngi, hynrei ka dei ruh na ka bynta ki nonghikai ha ka skul ba don tang iwei ki nonghikai ha ka shnong khappud, kiba trei ïa kane ka kam khlem da kwah burom namar ki pyrkhat beit ïa ka jingdonkam ki khynnah kiba shaniah tylli ha ki.
Da kaba pynskhem biang ïa ka thong treikam kaba skhem jong u, u Myntri Rangbah u la ong, “Ym don kano kano ka rukom treikam ha ka pule puthi kaba lah ban kiew palat ïa ka jinglong babha jong ki nonghikai, wat la ngi pynlut katno katno ka pisa ha ki jingtei, ne wat la ngi pyntreikam katno katno ki skhim.”
Haba pynkynmaw ïa u snem 2018, u Myntri Rangbah u la ong ba haba u la pan ïa ka plan ban pynkylla dur ïa ki jingtei bad ki jingdonkam jong ki skul, ka la pyni ba donkam haduh 3,000 klur. “Nga la khmih ïa ka screen bad nga la ong, ngam don 3,000 klur. Hynrei nga la ong ba ngin sdang, wat lada dei 10 tylli ki skul. Ka jingsdang treikam kaba bteng, barabor ka sdang da ka sienjam kaba nyngkong.”
Hadien hynriew snem, lyngba ka Mission Education, ka Sorkar ka la pynbha bad kyntiew ïa ki jingtei bad jingdonkam ha palat 2,000 tylli ki elementary Government school bad ka la pynbun ïa ki Higher Secondary Schools na ka 427 sha ka 545, da kaba wanrah ïa ka pule puthi kaba bha hajan ki iing jong iwei pa iwei i khynnah.
La ïathuh ba na ka Chief Minister’s Special Development Fund (CMSDF), ka bynta kaba bun tam ka la leit sha ka pule puthi, kaba long kumba 150-180 klur na ka 300-400 klur kaba la pynlut ha ki 8 snem ka jingtreikam kiba la dep.
“Lyngba ka Education Department, la pynlut 600-700 klur, nalor ki pisa CSR kiba la pynlut pura sha ka pule puthi.”
U Myntri Rangbah u la ïathuh ba ha ka sien kaba nyngkong naduh ba la sdang ïa ka Performance Grading Index, ka Meghalaya ka la ïoh ban mih noh na ka kyrdan kaba hapoh tam, da kaba kiew na Akanshi-3 sha Akanshi-1 hapoh tang shi snem, bad ka score ka la kiew na 448 point sha 525.7 point na ki 1,000 point. Kane ka jingkiew kaba 77.7 point ka dei ka jingpynbha kaba heh tam hapoh shi snem ba la ïoh jingithuh da kano kano ka Jylla ha ka ri, bad ka jingkiew kaba lang kaba 124 point (31%) hapoh saw snem.
U la ong ruh ba kane ka paw ha ki result kiba ktah ïa man la ka iing namar ka pass percentage ha SSLC ka long 97.2% bad ha HSSLC ka long 86.6% mynta u snem. La ong ruh ba ka jingkyntiew na Class X sha Class XI ka la kiew sha 82.1%, kaba mynta ka la tam ïa ka average jong ka ri, bad ka jingpep skul shiteng por ka la hiar shibun.
Da kaba kyntu ïa ki nonghikai ban phai biang sha ka jingthmu ba kongsan jong ka kam jong ki, u Myntri Rangbah u la ong, “Ngi ju shah khring ha ki kam ba man ka sngi ban pyndep ïa ka course naduh 9 baje haduh 5 baje, haduh ba ngi klet ïa ka jingthmu. Ka jingthmu jong uwei pa uwei u nonghikai ka long ban tei ïa ka jingim jong ki samla, bad haba phi tei ïa ki samla, phi tei ïa ka lawei jong ka ri.”
U la bthah ïa ki ophisar ban leit jngoh ïa 1-2 tylli ki skul man la ka taiew/arsngi ne shisien ha ka artaiew, bad ban upload ïa ki jingpeit bniah halor ki jinglong jingman ki iing skul, ki tiar bad ki jingdonkam ha skul, ka umdih bad kiwei kiwei, kiba yn lah ban ïohi beit da u Commissioner & Secretary, Director bad Myntri Rangbah na ka bynta ban shim ïa ki sienjam ban pynbeit. U la kyrpad ïa u Commissioner & Secretary bad Director ban peit bniah bad pyntreikam bha ïa kane.
“Kane ka jingtreikam kan dang bteng. Ngin ym kynran dien lano lano ruh. Ngi rai skhem ba ka tnat pule puthi ka dei ban kylla dur, bad ngin leh ïa kata, hynrei ngi donkam ïa baroh ban trei lang ha ka rukom kaba bha — to long shi bynta na kaban weng ïa ka jingeh, ym shi bynta ban wanrah jingeh,” u la ong, da kaba bynrap ba kawei pa kawei ka rai ka dei ban ïaid lyngba tang kawei ka jingkylli, “Kan ïarap ne em ïa ki khynnah pule?”
Ha kane ka prokram la wan shim bynta da ki ophisar ba hakhlieh jong ka Education Department, ki nonghikai, ki nongïoh khusnam, ki khynnah pule bad ki ophisar.