Pynbna u Myntri ïa ka mang tyngka ba 10 lak na bynta ka Thomas Jones Synod College Jowai

Khliehriat nailur 02: U myntri ka sorkar jylla, uba dei peit ïa ka pule puthi, u bah Wailadmiki Shylla haba kren kum u kongsan mynta ka sngi ha ka prokram Graduation Day Celebration 2026 ha Thomas Jones Synod College, Jowai, West Jaiñtia Hills District, u la pynsngew bad pynbna ïa ka khung Pisa kaba T10 lak tyngka ïa kane ka college bad kane ka dei ka jingnoh syniang kaba na ka liang jong u shimet kum ka jingiarap ha kaba ki bor pyniaid jong ka college ki lah ban thied ïa ki kor computer ban pyndonkam ha college
Haba phai sha kane ka Graduation Day Celebration, ki la don haduh 243 ngut ki samla pule kiba la shah pynkup burom bad nalor kine la pynkupburom kyrpang ruh ïa ki 7 ngut ki Topper kiba na ki Department bapher bapher bad kumjuh ruh ia ki 3 ngut kiba la pass bha ha ka HSSLC examination lem bad 2 ngut ki samla kiba ju iashimbynta ha ki jingialehkai Sports.
U kongsan, u la ong bad pynsngew sha ki samla pule ba ka jingthmu jong ka sorkar ka long ban pynkupbor ïa ki samla ba ki samla kin nym long tang kita ki nongwad kam, hynrei ba kin long ruh kita ki nong ai kam ïa kiwei, kumjuh ruh ba kin long kiba lah ban pynkylla ïa ki jingmut bad jingangnud jong kiwei ki samla ban pynlong ïa ka lawei kaba don jimgmut, u la ong ba ym tang ka jingtrei shitom bad jingkut jingmut jong ki samla pule hynrei ka jingaiti, ka pynshlur bad jingai mynsiem lang jong jong ki kmie ki kpa lem bad ki nonghikai, ki ba haïing ha sem bad ki paralok ka long kaba donkam.
Shuh shuh, u bah Wailadmiki Shylla, u la ai ki kyntien kitbok kitrwaing ïa ki samla pule da kaba bynrap “Ai ba ka jingpule jong phi kan long ka bor, kan long ka jingithuh bad ka jingnoh synniang sha ka imlang sahlang. Mynta ha ka jingim kin wan ki jingtynjuh ïa phi, ki jingtynjuh ba ïadei bad ka jingshlur, ka jinglong ba janai, bad ka jinglah ka jong phi”
U kyntu ia ki samla pule ba kin pyndonkam ïa ki jingstad kiba thymmai jong kane ka juk da ka jingkitkhlieh bad naka bynta ki jingmyntoi.
‘Ngi im ha ka juk ha kaba ka kam ka jam ka long ka jingeh, ymtang ha ka jylla Meghalaya hynrei ha baroh ka ri” u kyntu ïa ki samla ban ym dei ban ïa beh tang sha ka kam sorkar namar tang khyndiat eh ki post kiba lait bad na ka liang ka ka sorkar ka dang bteng ban wad ki lad ki lynti ha ka iohkam iohjam, hynrei ki samla ruh ki dei ban sngewthuh ba tang ka sorkar marwei kam lah ban ai kam ïa uwei pa uwei uba la dep ïa ki kyrdan jingpule, namar ka sorkar ha ka shi snem ka lah ban pynbna ïa ki post ba lait lyngba ka MPSC, DSC, Departmental, Contractual, kiba wan na ki scheme bad project bapher bapher tang kumba 2,000 haduh 2,500 tylli, hynrei ki samla kibala pyndep ïa ka Graduate ha ka shisnem pat ka long la jan haduh 65 hajar haduh 70 hajar ngut, Kumta u kyntu ïa ki samla ba ki dei ban pynkylla noh ïa ka rukom pyrkhat jong ki ha kaba ïadei bad ka iohkam iohjam, u la pynsngew shuh shuh da kaba ong ba na ka liang ka sorkar ka la ialeh shitom katba lah ban weng ïa ki jingeh jong ki samla da kaba ka thaw ïa ki lad ki lynti kiba yn pynlah ïa ki samla ban ieng ha la ki jong ki kjat da ka jingsdang ïa ka Yes Meghalaya, PRIME, CM Elevate, Skill Meghalaya, Hello Meghalaya, Meghalaya Grassroot Music bad kiwei kiwei.
Haba kren shuh shuh halor ka jingnang jingstad, u kongsan u la ong ba Ka jingnang jingstad kadei ruh kaba lah ban pynmih ïa ki briew kiba don ka jingkitkhlieh ïa ka imlang ka sahlang namar ka imlang sahlang ka donkam bha ïa ki samla kiba la nang la stad, kiba khlaiñ ha ka bor pyrkhat ban kyntait mardor ïa u drok bad ïa kino kino ki kam sniew, kumjuh ruh ka lawei shisha ka donkam eh ban pynneh pynsah ïa la ka lariti ka dustur, ban ïada bad ban sumar ïa ki spah mariang ban tyngkai na ka bynta ka lawei ka ban sa wan.
Kiba la ai jingkren ki kynthup ruh ka Principal jong ka Thomas Jones Synod College, Jowai, ka Dr. A. Nongbri, u Chairman Christian Education Department KJP Synod Mihngi, u bah BN. Lamare, u Chairman Governing Body, u Rev I.U.B. Pala.
Kiba la ïa don lang ha kane ka prokram ki kynthup ki kmie ki kpa jong ki samla pule, ki riew rangbah bad kiwei kiwei, ïa ka prokram la pyniaid da ka HOD Economics Department, ka kong C.D.Tongper.