24 tarik yn thang mombati ki 3 seng ha ïew Patharkhmah ban dawa ïaka jingbishar ka hok

Nongpoh, Rymphang 23: Ki 3 tylli ki kynhun sengbhalang ba kynthup ïaka KSU, FKJGP Western Border Area bad ka RBYF Patharkhmah Circle kila shim da ka sienjam ban pynlong da ka jingthang mombati haka 24 tarik (Sngi Saitjaiñ) ha ïew Patharkhmah naduh ka por 2 baje nohphai sngi kum ka dak ka jingsngewlem bad ka jingsngewsih halor ka jingshah pynïap dusmon jong u heprit Kitdorlang Marbaniang haka 18 tarik mynta u bnai haka shnong Umtangar ha Ri-Bhoi.
Naka liang ki nongïalam kitei ki seng naduh u Bah Receive Pator President KSU, Center Doloi President FKJGP Western Border Area bad u Samla Rishan Nongtri President ka RBYF Patharkhmah Circle kila pynpaw ba kum ki seng bhalang na katei ka thaiñ kim lah khlem da pynrem ïaki riew thrang snam ba donkti pynïap ïa u heprit ba dang 10 snem ka rta bad kaei ka daw ba u la leh tad haduh ban hap shim syndon ïaka jingim jong u.
Kila pynpaw ruh watla ki bor pulit kila ioh ban kem noh ïaki runar ba donkti, hynrei kum ka bor jong ka aiñ ka dei ban ai ka jingbishar kaba hok bad ban pynngat ruh ïakitei ki runar ba donkti da ka jingpynsajia kaba tyngeh.
Kumta naka liang kitei ki 3 seng ki khot bad wer ïaki paidbah kiba don ka jingsngewkhia halor ki kam pynïap dusmon khamtam ka jingshah pynïap utei u heprit ba kin wan ban snohktilang ha katei ka jingthang mombati ban pynpaw ka jingsngewsih bad ban dawa ka jingbishar kaba hok naka bynta u heprit Kitdorlang Marbañiang.