Nongstoiñ, Rymphang 23: Ka seng Hynñiewtrep National Youth Movement Mawshynrut Pyllun hapoh ka jingïalam u bah C. Sohshang President bad u bah B. Marthong Secretary Mawshynrut pyllun, mynta ka sngi ka la leit ban ai da ka jingthoh ha u Branch Manager jong ka State Bank of India jong ka Riangdo Branch, halor ka nongrim ka jingujor ki paidbah kiba la ong ba ha katei ka bank, la ju shah ban plie account tang kumba lai ngut ha ka shi sngi.
Ki nongïalam ki la ong ba ka jingleh jong ka Bank, ka la long ka jingduhnong kaba khraw haba ki paidbah ki mih na la ïing ban pynlut por, pynlut bai kali khnang ban leit pyndep ïa ki jingdonkam ha katei ka Bank. Phewse bun na ki, ki la hap ban phai thylli namar ka jingshah tang khyndiat ngut ban plie account.
Hadien ka jingïakren jong ka seng bad u Roshan Singh Nongthongbam u ba dei u Branch Manager jong katei ka Bank, lem bad u nongthoh khubor, la ïoh ban kylli pyrthew ïa utei u Manager bad u la jubab da kaba u la ong kam dei kaba ka Bank ka buh kyndon ban pyrkhing thik ban shah plie account tang lai ngut ha ka shi sngi.
Hynrei, dei namar ba ha ka Bank don tang uwei u nongtrei u ba leh ïa ki kam shaphang ki account, ban ai pisa, shim pisa, passbook bad kiwei kiwei ki kam. Kumta haba don ka por la shah ïa ki paidbah ba kin plie account katba lah teng teng wat 10 haduh 20 ngut ruh.
Haba bun kam bun sien la ailad tang kumba lai ne saw ngut namar ym lah ban pyndep ïa ki kam baroh tang da uwei u nongtrei ryngkat ma u kum u Manager. Ka tnad ruh kam lah ban buh bun ki nongtrei lada ka Bank kam don ka jingïohnong kaba kham bit.
Pynban wat la katta ruh na ka liang jong utei u Manager u la kular ban shimkhia ïa katei ka phang bad ban phah ha ki bor ki ba halor ba kin khmih lem ïa ki mat jingdonkam jong ka thaiñ.
