Nongstoiñ, Rymphang 23: Naduh ba ki skul ki la sdang ban plie, ki kmie ki kpa jong ki khynnah ki la sdang ban durut ha kaba leit sha ki skul ban pynrung ïa ki khun jong ki ha ki klass bapher bapher nalor kata ha ki la ïabeh ruh ban leit sha ki ïew ki hat na ka bynta ban thied ïa ki kot pule na ka bynta la ki jong ki khun.
Haba peit ïa ki dukan die kot ha sor Nongstoiñ khamtam ha ki sngi ïew, ki paitbah naduh ki longkmie haduh ki khynnah ki hap ban ïeng da u lain bad ki dukan ki shu dap briew baroh shi sngi khlem kut. Haba ïakren bad ki longkmie kiba ïeng laiñ ban thied kot, ki la ong ba ha ka jingshisha ïa ki kot lah ban ïoh na ki skul ruh, hynrei ym lah pat ban ïoh lut ïa baroh kata naduh ki kot pule haduh ki kopi kumta kat ïa kiba lah ban ïoh na ki dukan die kot ki hap ban shu leit thied. Nalor kata ki la ong ruh ba ha kiwei kiwei ki snem ka jingpoi jong ki kot sha ki skul bad ha ki dukan die kot ka kloi bha, hynrei mynta u snem pat ym tip na ka ei ka daw ba ka jingpoi ki kot sha ki skul bad sha ki dukan die kot ka suki bha.
Haba kylli, ki longkmie ki la ong ruh ba ka dor jong ki kot pule te ka long kumba ju long lait noh ki kopi te ki kham kiew tang kat ban biang ym dei kat haduh ban ong ba ki rem than. Ha kajuh ka por ki la ong ba ki skul ki la dep ban plie naduh ka taïew ba la dep, kumta ki nongpynïaid skul ki la dei ban pynkynmaw sha ki bor ba dei peit ïa ka pule puthi ba kin kham pynkloi ban pynpoi ïa ki kot sha baroh ki skul kiba dei ban ïoh, khnang ba ki nonghikai kin lah ban pynderp kham kloi ban hikai ïa ki course na ka bynta ki khynnah.
Ki la ong ruh ba lada ka jingpynpoi ïa ki kot sha ki skul ka shim por slem, kan wanrah jingeh ym tang ïa ki khynnah hynrei wat ïa ki nonghikai ruh namar ba kim don por shuh ban hikai bniah khnang ba ki khynnah kin sngewthuh bha bad kin lah ban khreh bha ïa ki lynnong.
