Khliehriat, Lber, 5: Ka Joint Action Committee (JAC) thaiñ Narpuh, East Jaiñtia Hills, kaba kynthup ïa bun tylli ki shnong hapoh ka jingïalam jong u President Bah Lasting Pala, uba dei ruh u waheh shong jong ka shnong Umkiang bad u Chairman Bah Love You Bareh uba dei u Waheh Shnong ka shnong Pyrtakuna ha ka jingïalang ba la pynlong ha ka sngi Baar ha ka shnong Umkiang ka la shim ïa ka rai ban pynlong da ka jing pakhang surok kaba 24 kynta ha ka 7 tarik mynta u bnai ka ban sdang naduh ka por 6:00 baje mynstep.
Ki nongïalam ka JAC ki la pynpaw ka jingsngew bitar namar ka jingleh bym salia jong ka Sorkar bad ka bym shym la shimkhia eiei ban phah maramot noh ïa kane ka surok kaba la jot rathai, watla na ka por sha ka por ki nongsynshar shnong bad ki paidbah jong ka Narpuh ki la dawa na ka Sorkar ban sngap lem ïa ka sur u paidbah ban sngewthuh lem ïa ka jingeh ki nongleit nongwan hynrei ka Sorkar kam patiaw eiei ruh.
Da kawei ka jingmut ka JAC, ka la rai ban shim da kane ka sienjam kaba tyngeh bad pynpaw ruh lada ka jingmaramot ïa ka surok ka dang sahteng ka JAC kan ïai bteng biang ïa kane ka jingpakhang lynti ïa ka surok ha Narpuh.
U Waheh Shnong jong ka Umkiang, u la ong, “ka surok ruh ym i dur surok shuh, ka jingkieng ruh ym i jingkieng shuh ynda la wan lei sa u slap kane kan sa twa bad tuid lut baroh. Kumba long mynta ka jingsniew ka surok ka la ktah ruh ïa ka leit ka wan namar lada ngi mut leit sha Khliehriat ka la shim por haduh 8-9 kynta ban poi. Tang wan u slap ki thliew ki syar kiba don ha surok ki ladap um lut baroh ym long shuh ban ïaid ki kali bad dei na kata ka daw ka jingkhot pakhang surok da ka JAC ka dei namarba ka sorkar kam shimkhia ban phah maramot ïa ka surok.”
“Ha ka 5 tarik, Rymphang ngi la ïakynduh ïa u Symbud Myntri Rangbah ka Jylla Bah Prestone Tyngsong uba khmih ïa ka tnat PWD (Roads) bad u ong ba ïa kane ka surok la aiti sha ka Dhar Company ban pyntrei. Hynrei ngi sngewlyngngoh ba haduh mynta ym pat don kaei kaei ka dak ban maramot ïa ka surok,” ula ong’
U la kyntu ruh ïa baroh ki nongshong shnong ba kin ïa mih paidbah ha ka 7 tarik ban sdang ïa ka jingpakhang surok.
U Bah Pala u la pynpaw ka jingsngewlem bad sngewsynei ïa ki Pulit ka Umkiang bad ïa ki Pulit ka Lumshnong kiba la trei shitom khlem shong thait ban pyllait ïa ka jingdheng kali kaba jia manla ka sngi. U la ong ba ki hap ban ïaid da ka kjat bun kilomitar naduh Umkiang shaduh Sonapur, kumjuh ruh ki Pulit Lumshnong ki ïaid kjat naduh Lumshnong shaduh Sonapur ban pyllait ïa ki kali kiba sahkut ha ka jingdheng kali.
“Balei ka Sorkar ka lehsting haduh katne katne kane, ka surok kam dei tang ïa ngi hynrei ka dei ka surok kaba baroh ki briew jong ka thaiñ Shatei Lammihngi ruh ki ju ïaid na kane ka lynti, ka jingsakut ha ka jingdheng kali kaba bun kynta ka ju pyn lynga ïa ki khyllung khynnah kiba shong hapoh ki kali kiba wan na ki jylla bapher bapher, ki ju ïam lynga hapoh ki kali, kumjuh ruh ka buh jingeh ïa ki kynthei ki khynnah, ki paidbah kiba ïaid na kane ka surok bad shisha ka long ruh kaba i jah burom ïa ka jylla lada ka surok National Highway ka long ha kane ka dur kaba wanrah jingeh ïa ki paidbah,” u la ong.
U Secretary shnong Umkiang, Bah Nicholas Lyngdoh u la ong, “ka rukom shnna surok da ka National Highway Authoriry of India (NHAI) ka dei kaba la shu shna tangdep namar kumba long mynta ki paidbah ki ïakynduh jingeh ha ka leit ka wan, ki khynnah skul ruh bun ba ki duh ban leit skul namar ka jingdheng kali kaba jur kaba na ka daw ka jingsniew ka surok.
“Ngi kyrpad ïa ka Sorkar ba lada shna ïa ka surok ym dei ban shu shna tang dep, tang ban ïoh ïa ka pisa, hynrei dei ban shna ha kata ka rukom kaba paka kaba dei ban don ruh ki nala tuid um kiba paka, wat ñiew beiñ ïa ngi tang namar ba ngi sah sha ki khappud, ngi ruh ngi don ka hok ban thep vote ban pynlong ïa ka Sorkar, lada phi leh beiñ ïa ngi ngi sngewsih, sngewbha shna ïa ka surok, ki nala kiba paka,” u la bynrap.
U Bah Love You Bareh, haba bynrap halor kane u la ong, “ngi la mad jingeh ha kaba ïadei bad ka jingsniew palat ka surok, ngi ladep khang ïa ka Toll gate ha Lumshnong hynrei u Deputy Commissioner u la khot ïa ngi na ka por sha ka por ban ïakren hynrei ngim pat shah satia ban plie ïa ka Toll Gate ha Lumshnong. Ngi ki nongïalam shnong ha ka 5 tarik u Rymphang ngi la leit ruh ban ïakynduh bad u Symbud Myntri Rangbah Bah Prestone Tyngsong ha kaba u la kular ruh ba ha u Lber ngin sa ïoh ka surok kaba bha hynrei haduh mynta ka sngi ngim ïohi dak eiei ban maramot ïa kane ka surok.”
U la ong ruh ba ka jingsniew ka surok ka la buh jingeh ïa ki nongleit nongwan, ka buh jingeh ruh ban pyndep ïa ki kam namar ka jingdheng kali ha kane ka surok kaba da ki kynta manla ka sngi.
“Namar ka Sorkar kam leh eiei ngin ïa mih paidbah ban pakhang noh ïa kane ka surok. Ki nongmihkhmat ruh kim leh eiei hato ki kheiñ ïa ngi ba ngi dei kiei. Ngi la kyrshan ïa ki nongmihkhmat hynrei ynda la jop kim peit shuh ïa ngi,” la kren bynñiaw u Bah Bareh.
