Shillong, Lber, 5: Uwei u dkhot barim jong ka United Achik Liberation Army (UALA) bad arngut kiwei pat kiba donkti ban pynkhlaiñ biang ïa ka Garo National Liberation Army (GNLA) ba la kheiñ be-aiñ ki la shah kem ha ki Pulit.
U Simsang K. Marak uba la 40 snem ka rta na Resubelpara u dei u dkhot barim ka UALA, la ïathuh u Superintendent of Police ka North Garo Hills u Bruno A. Sangma ha ka jingïakren bad ki lad pathai khubor ha ka sngi Baar
“U (Simsang) u dei uba hakhmat eh ha kane ka kam. U dei ruh uba la shah thwet ha ki Pulit Assam. Ka kashari na Assam ka la pynngat pyrshah ïa u ha ka MPWA bad ngin sa aiti ïa u sha ki Pulit ka Assam hadien ba ngi ladep tohkit ïa u ïa ki kam be-aiñ ha North Garo Hills,” u la ong.
Arngut kiwei pat kiba la shah kem ki dei kiba la ithuh kyrteng kum u T Sangma uba la 40 snem bad u Suresh Sangma 32 snem na Adogre, la ong u SP.
Ka jingïohkem ïa kine ki lai ngut ka long hadien ba ki Pulit ka Kharkutta Police Station ki la ïoh pdiang ïa ka ejahar ha ka 24 tarik Rymphang. Nalor kane, ka la don ruh ka shithi ba la thep ha ka social media ha ka 7 tarik, Rymphang kaba pyntip ïa ka jingpynkhlaiñ biang ïa ka GNLA.
“Ngi la kurup ïa ki mobile phone na ka met jong ki, kiba la pyndonkam ha ki kam runar. Ki donkti ban dawa pisa T. 20,000 na uwei u lanot ha North Garo Hills,” la ïathuh u Sangma.
Haba pynpaw ba ki Pulit kin dang kem shuh shuh ïa ki dkhot ha ki sngi ban sa wan, u SP u la ïathuh ba ki dang don sa kuimba 7-8 ngut ki dkhot ha kane ka kynhun bad ïa ngi ruh ngin ym pyllait suk hynrei ngin thwet tyngeh haduh ban da ïohkem.”
Haba kylli, u Sangma u ong, “bun na ki tiar siat ba la buhrieh da ka GNLA la ïoh kurup ha Williamnagar. Ïa mynta, ngim shym la ïoh kurup ïa ki tiar siat na ki,” u la bynrap.
